श्रेणी : अपराध

हेटौंडा,२६ जेठ । बागमती प्रदेश प्रहरी प्रमुख, प्रहरी नायव महानिरीक्षक (डीआईजी) अरुण पौडेलले अवैध लागुऔषधको खेतीविरुद्ध प्रहरी आक्रामक रूपमा उत्रिने स्पष्ट सन्देश दिएका छन्। सोमबार हेटौंडा–११ थानाभर्याङस्थित प्रदेश प्रहरी कार्यालयमा आयोजित पत्रकार सम्मेलनमा बोल्दै उनले, “यो वर्ष गाँजा र अफिमको ब्याड नै नष्ट गर्छौं, भनेर कडा चेतावनी दिए।

डीआईजी पौडेलले विशेष गरी सिन्धुली, मकवानपुर, चितवन र धादिङ जिल्लाहरूमा अवैध रूपमा मौलाउँदै गएको गाँजा र अफिम खेतीप्रति चिन्ता व्यक्त गरे। जसको जमिनमा यस्ता खेती पाइन्छ, ती व्यक्तिहरूलाई कानुनी दायरामा ल्याइनेछ, उनले भने।

उनका अनुसार प्रहरीले अपराध नियन्त्रण, अनुसन्धानको प्रभावकारिता र जनतामा सुरक्षाको अनुभूति दिलाउने अभियानलाई तीव्र बनाएको छ। साथै, ट्राफिक व्यवस्थापन, भिड नियन्त्रण, भीआईपी/भीभीआईपी सुरक्षा, र विपद् व्यवस्थापन जस्ता विषयलाई समेत उच्च प्राथमिकता दिएको जानकारी उनले दिए।

प्रेस सम्मेलनमा डीआईजी पौडेलको यो भनाइले लागुऔषध नियन्त्रणप्रति प्रदेश प्रहरीको गम्भीरता झल्काउँछ। उनले सामाजिक सुरक्षाको आधार बलियो बनाउन अवैध गतिविधिहरूविरुद्ध शून्य सहनशीलताको नीति अवलम्बन गरिने स्पष्ट पारे।