श्रेणी : धर्म संस्कृति

बीरगन्ज,०६ जेठ । बीरगन्ज महानगरपालिकाका मेयर राजेशमान सिंहले २०८२ सालको पवित्र हज यात्रामा सहभागी हुन साउदी अरब गइरहेका नेपाली हजयात्रीहरूलाई मंगलबार काठमाडौंको काश्मिरी पञ्च ताकिया नेपाली जामे मस्जिदमा पुगेर विदाइ दिए। उनीहरूलाई सफल, सुरक्षित र फलदायी यात्राको शुभकामना व्यक्त गर्दै मेयर सिंहले हज यात्रालाई धार्मिक मात्र नभई सांस्कृतिक सहिष्णुताको प्रतीकका रूपमा समेत महत्व दिएका छन्।

महानगर प्रमुख सिंहसँगै प्रमुख प्रशासकीय अधिकृत अरविन्द लाल कर्ण पनि कार्यक्रममा सहभागी थिए। मेयर सिंहले भने, “हज केवल मुस्लिम धर्मावलम्बीहरूको धार्मिक कर्तव्य होइन, यो विश्वभरका मानिसहरूबीच भाईचारा, मेलमिलाप र सहिष्णुताको सन्देश बोकेको सांस्कृतिक यात्रा हो। वीरगन्ज महानगरपालिकाको तर्फबाट सम्पूर्ण हजयात्रीलाई सफल यात्रा कामना गर्दछु।”

बीरगन्ज महानगर धार्मिक, जातीय र सांस्कृतिक रूपमा विविधता सम्पन्न शहर हो जहाँ हिन्दू, मुस्लिम, बौद्ध लगायत विभिन्न समुदायबीच सद्भाव कायम राख्न स्थानीय नेतृत्व सक्रिय छ। मेयर सिंहको हजयात्रीसँगको यस प्रकारको सहभागिता धार्मिक सहिष्णुताको स्पष्ट उदाहरण बनेको छ। यसले नगरपालिकाले मुस्लिम समुदायप्रति सम्मान र सहकार्यका नीति निरन्तरता दिने प्रतिबद्धता जनाएको छ।

नगरपालिकाले धार्मिक चाडपर्वमा सहभागिता, समुदायबीच संवाद र साझा सामाजिक योजनामा सहकार्यमार्फत एकता र साझा पहिचान निर्माण गर्ने प्रयास गरिरहेको मेयर सिंहले बताए।

हज के हो?
हज इस्लाम धर्मका पाँच स्तम्भमध्ये एक हो, जुन आर्थिक र शारीरिक रुपमा सक्षम प्रत्येक मुस्लिमले जीवनमा कम्तीमा एकपटक गर्ने धार्मिक कर्तव्य हो। यो यात्रा साउदी अरबको मक्का र मदिनामा सम्पन्न हुन्छ र प्रत्येक वर्ष हजारौं नेपाली मुस्लिम श्रद्धालुहरू यसमा सहभागी हुन्छन्।