श्रेणी : धर्म संस्कृति

वीरगन्ज,२४ माघ । बाराको विश्रामपुर गाउँपालिका-५ इटियाहीमा बिहीबारदेखि श्री शिवशक्ति कोटी होम महायज्ञ विधिवत रूपमा सुरु भएको छ। महायज्ञको उद्घाटन विश्रामपुर गाउँपालिकाका अध्यक्ष जुल्फकार अली भुट्टो, महायज्ञ मूल समितिका अध्यक्ष शिव शंकर प्रसाद यादव, वडा नम्बर ५ का वडाध्यक्ष अमिरी गुप्ता र वडा नम्बर २ का वडाध्यक्ष मनोज यादवले संयुक्त रूपमा रिबन काटेर गरे ।

महायज्ञ प्रचार समितिका संयोजक राज सर्राफका अनुसार पूजामा १५ जोडी पति-पत्नी जजमानको रूपमा सहभागी भएका छन् । मूल समितिका अध्यक्ष शिवशंकर प्रसाद यादव र गाउँपालिकाकी उपाध्यक्ष प्रियंका देवी पनि जजमानको रूपमा पूजामा बसेका छ ।

२२ दिनसम्म चल्ने महायज्ञमा मेलाको पनि आयोजना गरिएको छ। भक्तजनहरूको सुरक्षाका लागि ९ ओटा सीसीटीभी क्यामेरा र २०० भन्दा बढी स्वयंसेवक परिचालन गरिएको छ ।

मेलामा भक्तजनहरूको मनोरञ्जनका लागि पिङ, मृत्यु कुँवा जस्ता आकर्षणहरू राखिएका छन्। साथै, महायज्ञस्थलमा रामलीला र रासलीलाको प्रदर्शन पनि गरिने छ ।

महायज्ञका लागि १ हजार ११ देवीदेवताका मूर्तिहरू स्थापना गरिएको छ भने यसको अनुमानित लागत १ करोड ३० लाख रुपैयाँ रहेको संयोजक सर्राफले जानकारी दिए ।