श्रेणी : BANNER

वीरगंज (पर्सा), १ असार । वीरगञ्ज महानगरपालिका–५ मा पूर्व मेयर विजय सरावगीले स्थानीयवासीसँग प्रत्यक्ष भेटघाट तथा जनसंवाद कार्यक्रम सञ्चालन गर्दै समुदायका विविध समस्या, आवश्यकता र विकासका प्राथमिकताबारे छलफल गरेका छन्। कार्यक्रममा कार्यवाहक अध्यक्ष लियाकत अली, टोलवासी, सामाजिक अभियन्ता, युवा तथा विभिन्न क्षेत्रका सरोकारवालाहरूको उल्लेख्य उपस्थिति रहेको थियो।

जनसंवादका क्रममा स्थानीय बासिन्दाले सडकको अवस्था, ढल निकास, फोहोर व्यवस्थापन, खानेपानीको उपलब्धता, स्वास्थ्य तथा शैक्षिक सेवाको गुणस्तर, सार्वजनिक सुरक्षालगायतका विषयमा आफ्ना धारणा राखेका थिए। सहभागीहरूले विकास योजनाहरूलाई थप प्रभावकारी, पारदर्शी र नागरिकमैत्री बनाउन सम्बन्धित निकायले विशेष ध्यान दिनुपर्ने आवश्यकता पनि औंल्याए।

स्थानीयका गुनासा र सुझाव सुनेपछि पूर्व मेयर सरावगीले नागरिकसँग प्रत्यक्ष संवाद गरेर उनीहरूका वास्तविक समस्या र अपेक्षा बुझ्नु महत्वपूर्ण जिम्मेवारी भएको बताए। उनले वीरगञ्जको समग्र विकासलाई गति दिन र नागरिकको जीवनस्तर सुधार गर्न सबै पक्षबीच सहकार्य, समन्वय र साझा प्रयास आवश्यक रहेको उल्लेख गरे।

सरावगीले नागरिकबाट आएका उचित माग र सुझावलाई सम्बन्धित निकायसम्म पुर्‍याउने तथा समाधानका लागि आवश्यक पहल गर्ने प्रतिबद्धता समेत व्यक्त गरे। उनले विकासका योजनाहरू जनताको आवश्यकता र अपेक्षाअनुसार अघि बढ्नुपर्नेमा जोड दिए।

कार्यक्रममा सहभागी स्थानीयहरूले यस्ता खुला संवादले जनप्रतिनिधि तथा राजनीतिक नेतृत्व र नागरिकबीचको सम्बन्धलाई अझ सुदृढ बनाउने विश्वास व्यक्त गरे। उनीहरूका अनुसार प्रत्यक्ष अन्तरक्रियाबाट स्थानीय समस्याको पहिचान गर्न र समाधानका सम्भावित उपाय खोज्न सहज हुने गर्दछ।

स्थानीय विकास, सुशासनको प्रवर्द्धन तथा नागरिक सहभागितालाई थप सशक्त बनाउने उद्देश्यका साथ आयोजित उक्त कार्यक्रम सौहार्दपूर्ण र रचनात्मक वातावरणमा सम्पन्न भएको आयोजकले जनाएको छ।