श्रेणी : BANNER

वीरगंज । अहिलेको लोकतान्त्रिक व्यवस्थाको विकल्प नभएको नेपाली कांग्रेसका महामन्त्री गगन थापाले बताएका छन् । अहिलेको व्यवस्थामाथि विभिन्न प्रश्न उठीरहेको प्रति इङ्गित गर्दै उनले अहिलेको नेपालको व्यवस्था संसारकै उत्कृष्ट व्यस्था भएको दाबी गरेका हुन् ।

वीरगंजस्थित क्लासिक बैंक्वेटमा आयोजित अंकुश दैनिकको रजत महोत्सव समारोहलाई सम्बोधन गर्दै आफैले ल्याएको व्यवस्थाभित्र पनि विभिन्न निराशा छाएको बताए । उनले भने, अहिले देशमा कुनै खालको युद्ध पनि छैन, कसैले आक्रमण गरेको छैन । अन्तर्राष्ट्रिय सम्बन्ध पनि राम्रो हुँदैछ, जलविद्युत, पर्यटनको क्षेत्र पनि सुधार हुँदैछ । युवामा जोश र जाँगरसँगै केही गर्ने हुटहुटी हुँदाहुँदै पनि निराशा छ, आत्मविश्वास गुमेको छ ।’

निराशालाई हटाउने र वास्तविक समस्याको पहिचान गर्ने उद्देश्यले नै नागरिकसँग भेट्न, संवाद गर्नका लागि मेची महाकाली यात्रामा निस्किएको थापाले बताए ।

सोही अवसरमा अंकुश दैनिकले पत्रिका सञ्चालनका लागि महत्वपूर्ण सहयोग गर्ने विभिन्न व्यक्तिहरुलाई पनि सम्मान गरेको छ । राम सर्राफ, ओमप्रकाश खनाल, अनिल तिवारी, केसी लामिछाने, गोबिन्द देवकोटा, बिजय चौहान, शत्रुघन नेपाल, तुलसी भण्डारी, छठु साह, मुकुन्द आचार्य, शिव पटेल, सन्तोष रन्जितकार, अर्जुन गुप्ता, राजन रौनियार लगायत २५ जना सम्मानित भएका हुन् ।

त्यस्तै कबिर राणा, हरिहर बिरही र ईश्वरचन्द्र्र गौतमलाई दोसल्ला र सम्मान पत्रमार्फत सम्मान गरिएको थियो ।

अंकुश दैनिकका प्रधान सम्पादक तथा अध्यक्ष दिपेन्द्र चौहानको अध्यक्षतामा भएकाे कार्यक्रममा रजत महोत्सवलाई पर्सा क्षेत्र नम्बर १ का प्रतिनीधि सभा सदस्य एवम् जसपाका प्रमुख सचेतक प्रदीप यादव, क्षेत्र नम्बर २ का प्रतिनीधि सभा सदस्य अजय चौरसिया, नेपाली कांग्रेसका केन्द्रीय सदस्य अजयबाबु शिवाकोटी, प्रेस काउन्सिलका पूर्व सभापति हरिहर बिरही लगायतले मन्तव्य व्यक्त गरेका थिए ।

पत्रिकाले २५ बर्ष पुरा गरेकाे अवसरमा आयाेजित रजत महाेत्सव समाराेहकाे सहजीकरण माधुरी महतोले गरेकी थिइन् । कालिका टाईम्स