श्रेणी : BANNER

बारा । नेकपा एमालेका अध्यक्ष केपी शर्मा ओलीले मधेशको विकास गर्ने उपेन्द्र यादव नभएर एमाले भएको बताएका छन् । बुधबार बाराको गढीमाईमा आयोजित चुनावी सभालाई सम्बोधन गर्दै अध्यक्ष ओलीले अरुको भ्रममा नपर्न आग्रह गरेका हुन् ।

उनले विगतमा उपेन्द्र यादवलाई अप्ठेरो अवस्थामा साथ दिएको तर अहिले धोका दिएको बताए । अध्यक्ष ओलीले उपेन्द्रजीले जितेपछि फुलमाला लाउनेबाहेक केही नगर्ने बताए ।

उनले भने, ‘उहाँ पहिला मोरङबाट लड्नुहुन्थ्यो त्यहाँबाट उखेल्लिएपछि सुनसरीबाट लड्नुभयो । त्यहाँबाट सप्तरी आउनुभएको थियो त्यहाँ पनि जरा टक्टकाएपछि सबैभन्दा लाटासोझा जनता यहाँ छन् भनेर बारा आएका छन् । उहाँ जितेपछि फुलमाल अबिर लगाउनुबाहेक गर्नु के हुन्छ ?’’

उनले बारा–२ मा पुरुषोत्तम पौडेल जित्ने दावी गरे । उनले भने, ‘एमालेको विजय सुनिश्चित भइसकेको देखेको छु । यहाँ अनेक प्रकारका भ्रमपूर्ण विषाक्त नाराहरू लाग्न सक्छन् । जातीवादी नारा लाग्न सक्छन् । तपाईंहरू सतर्क रहनुहोला ।’उनले एमालेको एउटै उद्देश्य देशमा गरिबीको अन्त्य गर्नु रहेको बताए ।