श्रेणी : राजनीति

विराटनगर । नेकपा एमालेका अध्यक्ष केपी शर्मा ओलीले गृह मन्त्रालय राष्ट्रिय स्वतन्त्र पार्टीले पाउनुपर्ने बताएका छन् ।

बिहीबार विराटनगर विमानस्थलमा पत्रकारहरुसँग कुरा गर्दै अध्यक्ष ओलीले रास्वपाका सभापति रवि लामिछानेलाई पहिले तोकेकाले अहिले पनि उसैले पाउनुपर्ने बताएका हुन् । उनले भने, ‘’कसलाई बनाउने भन्ने कुरा राष्ट्रिय स्वतन्त्र पार्टीको कुरा हो। हामीले गृह मन्त्रालयको उसलाई दिएका हौँ। त्यो पार्टीले रवि लामिछानेलाई पहिले तोकेको हो। त्यसअनुसार बनाएका हौँ । फेरि पनि रवि लामिछानेलाई नै दिनुपर्छ भन्छ भने त्यो उसको कुरा हो।’

उनले प्रधानमन्त्रीको भनाईतर्फ संकते गर्दै रास्वपालाई गृहमन्त्रालय दिन सर्वोच्चको पूर्णपाठ आवश्यक नभएको बताए । उनले भने, ‘पूर्णपाठ किन चाहियो? कण्ठ गर्ने हो र पूर्णपाठ?’ उनले यसअघिको सहमति अनुसार अघि बढ्नुपर्ने बताए ।

उनले भने, ‘कुन–कुन पार्टीले के लिने भनेर के सहमति भएको हो, तपाईंहरुलाई थाहा छ। त्यसै अनुसार अगाडि जानुपर्छ ।’

गत पुस ११ गते लामिछाने उपप्रधान तथा गृहमन्त्री भएका थिए। तर, गत शुक्रबार सर्वोच्च अदालतको संवैधानिक इजलासले लामिछानेको नागरिकता प्रकरणमा फैसला सुनाएपछि भने लामिछानेले सांसद, मन्त्री र पार्टी सभापति पद गुमाएका थिए।

लामिछाने पुनः नेपाली नागरिकता लिएपछि गृहमन्त्री पद हत्याउन लागिपरेका छन् । तर प्रधानमन्त्री सर्वोच्चको पूर्णपाठ नआउन्जेल अरुलाई गृहमन्त्रालय नदिने पक्षमा छन् ।