श्रेणी : BANNER

वीरगञ्ज, २६ माघ । खानेपानी तथा सरसफाइ क्षेत्रमा प्रदीप यादवले नेतृत्व सम्हालेपछि देखिएको तीव्र कार्यसम्पादन अहिले जनचासो र राजनीतिक बहसको केन्द्र बनेको छ। नारा र प्रतिबद्धताभन्दा परिणामलाई प्राथमिकता दिने उनको कार्यशैलीले स्थानीय तहदेखि राष्ट्रिय स्तरसम्म प्रभाव छोडेको छ, जसको प्रत्यक्ष असर मतदाताको मनोविज्ञानमा देखिन थालेको छ।

एक वर्षभित्रै देखिने उपलब्धि

गत वर्ष असार ३१ गते जिम्मेवारी सम्हालेपछि यादवले छोटो अवधिमै ठोस नतिजा देखाए। मेलम्ची खानेपानी आयोजनाअन्तर्गत रिवर्मा खोलाबाट पानी पथान्तरण गरी उपत्यकामा वर्षभरि नियमित खानेपानी आपूर्ति सम्भव बनाइनु उनको कार्यकालको सबैभन्दा चर्चित उपलब्धिमध्ये एक हो। यो पहलले दीर्घकालीन खानेपानी संकट समाधानतर्फ निर्णायक मोड दिएको विश्लेषकहरूको भनाइ छ।

बजेट व्यवस्थापन र कार्यान्वयन क्षमता

आर्थिक वर्ष २०८१/८२ का लागि करिब १२ अर्ब रुपैयाँ बराबरको स्रोत सहमति जुटाइनु यादवको नेतृत्व क्षमताको अर्को संकेत हो। खानेपानी तथा ढल व्यवस्थापन विभागअन्तर्गत सञ्चालनमा रहेका आयोजनाहरूमा पूँजीगत खर्च ८६ प्रतिशतसम्म पुग्नुले योजना बनाउने मात्र होइन, कार्यान्वयनमा समेत उनको पकड देखाएको छ।

देशभर आयोजनाको विस्तार

उनको कार्यकालमा उर्लाबारी बृहत् सहलगानी आयोजना, बेलडाँगी खानेपानी आयोजना लगायत देशका विभिन्न स्थानमा ८६ वटा खानेपानी आयोजना सम्पन्न भई सञ्चालनमा आएका छन्। यसले हजारौँ घरधुरीलाई सुरक्षित र नियमित खानेपानी पहुँच सुनिश्चित गरेको छ।

उपत्यकाको चक्रपथ बाहिर मेलम्ची खानेपानी विस्तारका लागि पाँच प्याकेजमार्फत सार्वजनिक खरिद प्रक्रिया अघि बढाइनु, सुन्दरीजलमा २५.५ करोड लिटर क्षमताको अत्याधुनिक पानी प्रशोधन केन्द्र निर्माण प्रक्रिया सुरु हुनु तथा कीर्तिपुर र महाँकालचौरमा ठूला क्षमताका ट्याङ्की निर्माण सम्पन्न हुनु दीर्घकालीन पूर्वाधार निर्माणतर्फका कदम मानिन्छन्।

मधेसमा संकट समाधानको प्रत्यक्ष हस्तक्षेप

मधेस प्रदेशमा गहिरिँदै गएको खानेपानी संकट समाधानका लागि यादव स्वयं मैदानमा उत्रिएका थिए। २५० भन्दा बढी स्थानमा डिप बोरिङ निर्माण सम्पन्न गरिनु यस क्षेत्रका लागि निर्णायक कदम बनेको छ। वीरगञ्ज महानगरपालिकामा वर्षौँदेखि रहेको खानेपानी समस्या एक साताभित्रै घर–घरमा पाइपलाइनमार्फत स्वच्छ पानी पुर्‍याएर समाधान गरिएको उदाहरण आज पनि स्थानीयले स्मरण गरिरहेका छन्।

दीर्घकालीन योजना र स्थानीय लाभ

तात्कालिक समाधानमै सीमित नरही यादवले वीरगञ्ज र पर्सा निर्वाचन क्षेत्र नं. १ लाई केन्द्रमा राखेर दीर्घकालीन खानेपानी परियोजनाहरू अघि बढाए। केही योजना सञ्चालनमा आइसकेका छन् भने केही निर्माण र कार्यान्वयनको चरणमा छन्।

खानेपानीसँगै ग्रामीण क्षेत्रमा वर्षौँदेखि जीर्ण अवस्थामा रहेका सडकहरूको पक्कीकरणले जनजीवन सहज बनाएको छ। सडक विस्तारपछि “अब भोट माग्न आउनु पर्दैन” भन्ने स्थानीय अभिव्यक्ति आफैँमा जनसन्तुष्टिको संकेत मानिन्छ।

नीतिगत सुधार र संस्थागत सुदृढीकरण

उनको नेतृत्वकालमा नीतिगत तहमा पनि महत्वपूर्ण सुधार भए। अस्थायी रूपमा सञ्चालनमा रहेका आयोजनाहरूलाई स्थायित्व दिँदै १५ वटा स्थायी कार्यालय स्थापना गरियो। खानेपानी तथा सरसफाइ नियमावली, २०८१ लागू गरिनुका साथै सहलगानी आयोजना निर्देशिका अद्यावधिक गर्दै जनसहभागिता शुल्क ३० प्रतिशतबाट घटाएर १५ प्रतिशतमा झारियो। यसले गरिब तथा मध्यम वर्गका उपभोक्तालाई प्रत्यक्ष राहत दिएको छ।

कामका आधारमा बढ्दो जनविश्वास

यिनै ठोस उपलब्धि, जनताप्रतिको प्रत्यक्ष पहुँच र स्पष्ट विकास दृष्टिकोणका कारण प्रदीप यादवप्रति स्थानीय मतदाताको भरोसा बढ्दै गएको देखिन्छ। पर्सा निर्वाचन क्षेत्र नं. १ मा यसपटकको चुनाव परिणाम कामको मूल्याङ्कनबाट तय हुने संकेतहरू स्पष्ट देखिन थालेका छन्।