श्रेणी : BANNER

जनकपुर,२१ वैशाख । सुनसरीको रामधुनी नगरपालिका–६ बाट एम्बुलेन्स प्रयोग गरी लागुऔषध गाँजा तस्करी गरिँदै आएको खुलासा भएको छ। प्रहरीको विशेष अपरेसनमा १८० किलो गाँजा बरामद हुनुका साथै एक जना पक्राउ परेका छन्।

इलाका प्रहरी कार्यालय इटहरी, धरान, पकली र रामधुनीबाट खटिएको संयुक्त टोलीले वैशाख १ गते राति ९ बजे सवारी जाँचका क्रममा बीआर ३८ पी ५४१४ नम्बरको भारतीय एम्बुलेन्समा लुकाइराखिएको ६ बोरामा गाँजा फेला पारेको हो। गाँजासहित बराहक्षेत्र नगरपालिका–४ का २५ वर्षीय चालक श्रीराजकुमार साहलाई पक्राउ गरिएको प्रहरीले जनाएको छ।

प्रहरीका अनुसार, एम्बुलेन्सलाई अत्यावश्यक सेवाको आवरणमा प्रयोग गरी सडक सुरक्षाको दुरुपयोग गर्दै गाँजा तस्करी गरिएको थियो। तस्करीमा संलग्न थप व्यक्तिहरुको खोजीका साथै यस शृंखलाबारे विस्तृत अनुसन्धान सुरु गरिएको जिल्ला प्रहरी कार्यालय सुनसरीले जनाएको छ।

सुरक्षाकर्मीहरूले एम्बुलेन्सजस्तो सेवामूलक साधनको दुरुपयोग भएको घटनाले चिन्ता उत्पन्न गराएको भन्दै यस्ता गैरकानुनी गतिविधिविरुद्ध थप निगरानी र कडा कानुनी कारबाही अघि बढाउने प्रतिबद्धता व्यक्त गरेका छन्।