श्रेणी : मधेस

जनकपुर,०९ पुस । नवलपुर–मलङ्गवा सडकखण्ड अन्तर्गत हरिपुर नगरपालिका-३, फरहदवामा सोमबार साँझ ट्याक्टरसँग ठोक्किँदा १९ वर्षीय मोटरसाइकल चालक चन्दन यादवको ज्यान गएको छ।

कविलासी नगरपालिका-७ निवासी यादवले चलाएको बीआर ०५ एक्यू ८७५९ नम्बरको भारतीय मोटरसाइकल बालुवा बोकेको ज २ त ४५२ नम्बरको ट्याक्टरसँग ठोक्किएको थियो। दुर्घटना फरहदवास्थित चिरान मिल अगाडि भएको हो।

घटनापछि गम्भीर घाइते भएका यादवलाई तत्काल प्रादेशिक अस्पताल मलङ्गवा पुर्याइए पनि चिकित्सकले उनलाई मृत घोषित गरेका थिए। मृतकको शव पोस्टमार्टमका लागि अस्पतालमा राखिएको इलाका प्रहरी कार्यालय हरिपुरका प्रहरी निरीक्षक रोमनराज अर्यालले जानकारी दिए।

प्रहरीले दुर्घटनामा संलग्न ट्याक्टर र मोटरसाइकललाई नियन्त्रणमा लिएको छ भने फरार रहेका ट्याक्टर चालकको खोजी भइरहेको छ।