श्रेणी : प्रदेश

तेह्रथुम,०७ पुस । टिकटक भिडियो बनाउन खोज्दा दुई जनाको ज्यान गएको छ। शनिबार दिउँसो मेन्छ्यायेम गाउँपालिका–५ स्थित खोरङ्वा खोलामा टिकटक बनाउने क्रममा चिप्लिएर बगेका २३ वर्षीया नर्स रविना राजवंशी र १३ वर्षीया छात्रा सुस्मिता भट्टराईको मृत्यु भएको हो।

रविना राजवंशी गौखुरी माविमा नर्सका रूपमा कार्यरत थिइन् भने सुस्मिता भट्टराई सोही विद्यालयमा कक्षा ७ मा अध्ययनरत थिइन्। विद्यालयका सहायक प्रधानाध्यापक कमल सापकोटाका अनुसार उनीहरू शनिबार बिदा मनाउन खोरङ्वा खोलामा गएका थिए।

चिप्लिएर खोलामा खसेका उनीहरूको शव आज साँझ फेला परेको जिल्ला प्रहरी कार्यालयका प्रमुख चिनिमाया तामाङले जानकारी दिइन्। मृतकका शव आइतबार परिवारलाई हस्तान्तरण गरिने तयारी गरिएको छ।

यस दुःखद घटनाले सामाजिक सञ्जालका लागि सामग्री बनाउने क्रममा सतर्कता अपनाउनुपर्ने आवश्यकता झल्काएको छ।