श्रेणी : BANNER

वीरगञ्ज (पर्सा), ९ फागुन । पर्सा निर्वाचन क्षेत्र नम्बर–२ अन्तर्गत वीरगञ्ज महानगरपालिका–२५ मा नेपाल कम्युनिस्ट पार्टी (एमाले) की उम्मेदवार रिमा यादव ले शनिबार बिहान व्यापक घरदैलो अभियान सञ्चालन गरेकी छन्।
श्रीसिया, खालवा टोला श्रीसिया र मौसे श्रीसिया टोलसम्म पुगेकी यादवलाई स्थानीयवासीहरूले फूलमाला लगाएर उत्साहपूर्वक स्वागत गरेका थिए। अभियानका क्रममा स्थानीय सहभागिता उल्लेखनीय देखिएको थियो।
“सीमावर्ती जनताको पीडा अब बेवास्ता हुँदैन”
सुरक्षा, स्वास्थ्य र रोजगारी प्राथमिकतामा
घरदैलो कार्यक्रमका क्रममा यादवले स्थानीय नागरिकका गुनासा ध्यानपूर्वक सुन्दै तिनको समाधानका लागि पहल गर्ने प्रतिबद्धता व्यक्त गरिन्। सिमावर्ती क्षेत्रका बासिन्दाले भोग्दै आएका सुरक्षा चुनौती, स्वास्थ्य सेवा अभाव, शिक्षा, रोजगारी, सडक तथा खानेपानीजस्ता आधारभूत समस्यालाई संसदमा प्राथमिकताका साथ उठाउने उनको भनाइ थियो।
“सीमावर्ती गाउँका जनता अझै पनि आधारभूत सेवा र अवसरबाट वञ्चित छन्। म उनीहरूको हकअधिकार सुनिश्चित गर्न दृढ रूपमा उभिनेछु,” यादवले स्थानीयसँग संवाद गर्दै भनिन्।
पुराना नेतामाथि प्रश्न
“अब भाषण होइन, परिणाम चाहिन्छ”
यादवले विगतमा निर्वाचित नेताहरू जनअपेक्षाअनुसार काम गर्न असफल भएको उल्लेख गर्दै अब नयाँ सोच र कार्यक्षमतासहितको नेतृत्व आवश्यक रहेको बताइन्। उनले युवापुस्ताको सक्रिय सहभागिताले राजनीतिमा सकारात्मक परिवर्तन ल्याउने विश्वास व्यक्त गरिन्।
“जनताले अब भाषण होइन, प्रत्यक्ष परिणाम खोजिरहेका छन्,” उनको जोड थियो।
एमाले नेतृत्वको सक्रिय उपस्थिति
स्थानीय माग घोषणापत्रमा समेटिने
घरदैलो कार्यक्रममा एमालेका केन्द्रीय सदस्य विजय सरावगी, उपाध्यक्ष तथा समानुपातिक उम्मेदवार बिचारी यादव, युवा नेता मुकेश द्विवेदी, अजय साहलगायत स्थानीय नेता–कार्यकर्ताको सक्रिय सहभागिता रहेको थियो।
स्थानीय बासिन्दाले सिमावर्ती क्षेत्रमा चोरी–तस्करी नियन्त्रण, रोजगारी सिर्जना, गुणस्तरीय शिक्षा तथा स्वास्थ्य सेवा विस्तार, सडक स्तरोन्नति र कृषि उपजको बजार व्यवस्थापनको माग राखेका थिए। यादवले ती सबै मागलाई आफ्नो चुनावी घोषणापत्रमा समेटेर कार्यान्वयनमा लैजाने प्रतिबद्धता जनाइन्।