श्रेणी : खेलकुद

वीरगन्ज, २१ पुस ।  नेपाल क्रिकेट संघ (क्यान)ले आगामी माघ ५ देखि २० गतेसम्म मलेसियामा हुने आइसीसी यु–१९ महिला विश्वकपका लागि नेपाली टोलीको घोषणा गरेको छ। पूजा महतोको कप्तानीमा १५ सदस्यीय टोली चयन गरिएको छ, जसले नेपालको क्रिकेटमा नयाँ उचाइ स्थापित गर्ने अपेक्षा गरिएको छ ।

घोषित टोलीमा उपकप्तानको भूमिकामा सोनी पाख्रिन रहनेछिन्। अन्य खेलाडीहरूमा साना प्रवीण, ज्योत्सिन्का मरासिनी, कुसुम गोदार, सावित्री धामी, कृश्मा गुरुङ, रिया शर्मा, सिमाना केसी, स्नेहा महरा, किरणकुमारी कुँवर, रचना चौधरी, तृष्णा विक, अनु कडायत, र एलिसा कुमारी यादव समावेश छन्।

नेपालले यु–१९ एसिया छनोट प्रतियोगितामा च्याम्पियन बन्दै पहिलोपटक विश्वकपमा स्थान पक्का गरेको हो। समूह ‘डी’ मा परेका नेपालले बङ्गलादेश, अस्ट्रेलिया, र स्कटल्यान्डविरुद्ध प्रतिस्पर्धा गर्नेछ। नेपालले पहिलो खेल माघ ५ गते बङ्गलादेशविरुद्ध, दोस्रो खेल माघ ७ गते स्कटल्यान्डसँग, र तेस्रो खेल माघ ९ गते अस्ट्रेलियासँग खेल्ने तालिका रहेको छ ।

नेपालको यस सहभागिताले युवा खेलाडीहरूलाई अन्तर्राष्ट्रिय क्रिकेटमा आफ्नो क्षमताको प्रदर्शन गर्ने सुनौलो अवसर प्रदान गर्नेछ। क्यानद्वारा चयन गरिएको टोलीले नेपालको क्रिकेटलाई विश्वस्तरमा चिनाउने र ऐतिहासिक सफलता हासिल गर्ने लक्ष्य लिएको छ ।