श्रेणी : BANNER

वीरगंज (पर्सा), २७ वैशाख । वीरगंज महानगरपालिकाले आइतबारका दिन अनिवार्य रूपमा पठनपाठन बन्द गर्न संस्थागत विद्यालय तथा मन्टेश्वरीहरूलाई कडा निर्देशन दिएको छ । संघीय सरकारले सरकारी कार्यालयसँगै शैक्षिक संस्थामा पनि हप्तामा दुई दिन अर्थात् शनिबार र आइतबार बिदा दिने व्यवस्था लागू गरेपछि समेत वीरगंजका केही निजी विद्यालयहरूले सार्वजनिक बिदाको दिनमा कक्षा सञ्चालन गरिरहेको पाइएपछि महानगरले यस्तो निर्देशन जारी गरेको हो ।

महानगरपालिकाको शैक्षिक प्रशासन महाशाखाले सूचना जारी गर्दै अर्को आदेश नभएसम्म आइतबार कुनै पनि हालतमा नियमित पठनपाठन सञ्चालन नगर्न स्पष्ट चेतावनी दिएको छ । महाशाखा प्रमुख आनन्द लामिछानेद्वारा जारी सूचनामा केही विद्यालयहरूले सार्वजनिक बिदाको दिनसमेत विद्यार्थी बोलाएर कक्षा सञ्चालन गरिरहेको जानकारी प्राप्त भएकाले त्यसप्रति महानगर गम्भीर बनेको उल्लेख गरिएको छ ।

महानगरपालिकाले अब विद्यालयहरूको अनुगमनलाई थप कडाइका साथ अघि बढाउने जनाएको छ । निर्देशन उल्लंघन गर्दै आइतबार विद्यालय सञ्चालन गरेको पाइए कानुनअनुसार कारबाही गरिने चेतावनीसमेत दिइएको छ । यससँगै महानगरपालिकाले विद्यालयभित्रैबाट पाठ्यपुस्तक, विद्यालय पोशाक तथा स्टेशनरी सामग्री बिक्री वितरण भइरहेको गुनासोप्रति पनि आपत्ति जनाएको छ । केही निजी विद्यालयहरूले विद्यालयलाई व्यापारिक केन्द्रकै रूपमा प्रयोग गर्दै अभिभावकमाथि अनावश्यक आर्थिक भार थपिरहेको निष्कर्ष निकाल्दै महानगरले यस्तो गतिविधि तत्काल बन्द गर्न निर्देशन दिएको हो ।

महानगरका अनुसार पाठ्यक्रम विकास केन्द्रले निर्धारण गरेभन्दा बढी तथा अनावश्यक पुस्तक विद्यार्थीलाई प्रयोग गराउने प्रवृत्ति पनि बढ्दो अवस्थामा रहेको पाइएको छ । आवश्यकभन्दा बढी पुस्तकको बोझले बालबालिकाको मानसिक तथा शारीरिक विकासमा प्रत्यक्ष असर पर्ने भन्दै महानगरले यसलाई गम्भीर विषयका रूपमा लिएको जनाएको छ ।

विद्यार्थीलाई आवश्यकता नभएका अतिरिक्त पुस्तक खरिद गर्न बाध्य पारेर अभिभावकलाई आर्थिक तनाव दिने तथा बालबालिकामाथि अनावश्यक शैक्षिक दबाब सिर्जना गर्ने कार्य सह्य नहुने महानगरपालिकाको स्पष्ट चेतावनी छ । अनुगमनका क्रममा विद्यालयहरूले अनावश्यक पुस्तक प्रयोग गराएको, विद्यालय परिसरमै किताब तथा पोशाक बिक्री गरेको वा सार्वजनिक बिदाका दिन कक्षा सञ्चालन गरेको पाइए सम्बन्धित विद्यालय प्रशासनमाथि कानुनअनुसार कारबाही प्रक्रिया अघि बढाइने महानगरपालिकाले जनाएको छ ।

महानगरपालिकाले शिक्षा क्षेत्रलाई सेवामूलक र मर्यादित बनाउनु पर्नेमा जोड दिँदै विद्यालयलाई व्यापारिक नाफाको माध्यम बनाउने प्रवृत्ति नियन्त्रण गर्न अब थप कडा निगरानी गरिने संकेत दिएको छ ।