श्रेणी : मधेस

वीरगंज (पर्सा), ७ फागुन । पर्सा निर्वाचन क्षेत्र नम्बर–२ मा प्रतिनिधिसभा सदस्यका उम्मेदवार अशोक टेमानी ले वीरगंज महानगरपालिका–१० (आदर्शनगर) का दीर्घकालीन शहरी समस्यालाई आफ्नो प्रमुख चुनावी एजेण्डाको केन्द्रमा राख्दै समाधानमुखी प्रतिबद्धता सार्वजनिक गरेका छन्। तीव्र बन्दै गएको चुनावी अभियानअन्तर्गत उनले वडा–१० मा घरदैलो कार्यक्रम सञ्चालन गर्दै स्थानीय मतदातासँग प्रत्यक्ष संवाद र समस्या संकलन गरेका हुन्।
घरदैलोका क्रममा स्थानीयवासीले सडकको दुरावस्था, ढल निकास अवरुद्ध हुँदा फैलिने दुर्गन्ध, अव्यवस्थित पार्किङका कारण हुने दैनिक ट्राफिक जाम, फोहोर व्यवस्थापनको कमजोरी, खानेपानी आपूर्तिको अनियमितता तथा शहरी सुरक्षासम्बन्धी चिन्ता खुलस्त राखेका थिए। वर्षायाममा सडक जलमग्न हुने समस्या, गल्ली–गल्लीमा सडक बत्तीको अभाव र पुराना खानेपानी पाइपलाइनका कारण पानीको गुणस्तर बिग्रँदै गएको गुनासो पनि मतदाताले राखे।
यस्ता समस्या अस्थायी योजनाबाट समाधान नहुने उल्लेख गर्दै टेमानीले दीर्घकालीन पूर्वाधार विकास र एकीकृत शहरी व्यवस्थापनको आवश्यकता औंल्याए। संघीय संसद्मा निर्वाचित भएपछि वीरगंज का मुख्य शहरी चुनौतीलाई प्राथमिकतामा राखी सम्बन्धित मन्त्रालय र निकायसँग समन्वय गरेर स्थायी समाधानतर्फ पहल गर्ने उनको प्रतिबद्धता छ।
उनले शहरी व्यवस्थापनमा पारदर्शिता, जवाफदेहिता र प्रभावकारी अनुगमन अनिवार्य भएको बताउँदै संघीय तहबाट बजेट विनियोजन र योजनाको कार्यान्वयनमा आफू सक्रिय रहने स्पष्ट पारे। “वडा–१० का समस्या केवल स्थानीय सीमामा सीमित छैनन्; यो समग्र पर्सा–२ को शहरी चुनौती हो,” भन्दै उनले दीर्घकालीन दृष्टिकोणसहितको योजना बिना दिगो समाधान सम्भव नहुने धारणा राखे।
मतदाताले विकासका आश्वासनभन्दा ठोस कार्यान्वयन चाहिएको बताउँदा टेमानीले निर्वाचनपछि नियमित जनसम्पर्क, सार्वजनिक सुनुवाइ र प्रगति प्रतिवेदनमार्फत नागरिकलाई जानकारी गराउने प्रणाली विकास गर्ने आश्वासन दिए। अभियानलाई थप सशक्त बनाउँदै उनले वडा–१० का मतदातासँग अमूल्य मत दिएर विजयी बनाउन आग्रहसमेत गरे।
निर्वाचन मिति नजिकिँदै जाँदा पर्सा–२ मा प्रतिस्पर्धा चर्किंदै गएको सन्दर्भमा घनाबस्ती क्षेत्र केन्द्रित अभियान, स्पष्ट एजेण्डा र कार्यान्वयनमुखी प्रतिबद्धताले टेमानीको उम्मेदवारीलाई थप आधार दिएको विश्लेषण हुन थालेको छ। स्थानीय मुद्दालाई राष्ट्रिय मञ्चमा उठाउने अठोटसहित अघि बढेको उनको अभियानले चुनावी समीकरणमा महत्वपूर्ण प्रभाव पार्ने संकेत देखिएको छ।