श्रेणी : अर्थ

बीरगन्ज,२२ साउन । पर्सा जिल्लाको पटेर्वा सुगौली गाउँपालिका–१ मा अवस्थित प्रसिद्ध धार्मिक स्थल रामभौरी भाठा धाम मा रहेको दुग्धेश्वरनाथ महादेव मन्दिरको धर्मशाला निर्माण कार्य १५ वर्षदेखि अधुरो छ।

स्थानीय बासिन्दा र मन्दिर व्यवस्थापन समितिले चन्दा संकलन र श्रमदानमार्फत धर्मशाला निर्माण थाले पनि आवश्यक बजेट नपुग्नु र राष्ट्रिय निकुञ्जको अनुमति प्रक्रियामा अड्किएपछि निर्माण कार्य रोकिएको हो।

दुग्धेश्वरनाथ महादेव मन्दिर निर्माण तथा संरक्षण समितिका अध्यक्ष अलखदेवप्रसाद थारूका अनुसार धर्मशालामा करिब एक हजार भक्तजन अट्न सक्ने व्यवस्था मिल्नेछ। तर अहिलेसम्म आधारभूत संरचनासमेत पूर्ण नहुनु दुःखद पक्ष हो।
“गाउँले स्वयंले चन्दा उठाएर र श्रमदान गरेर दुई तल्ले धर्मशाला बनाउन थाल्यौं,” अध्यक्ष थारू भन्छन्, “तर निकुञ्ज प्रशासनले संरचना निर्माणमा रोक लगाएपछि काम बीचमै रोकियो।”

अहिलेसम्म धर्मशालाको दुई तल्ला ढलान गरिएको छ। तर झ्याल, ढोका, शौचालय, प्लास्टरजस्ता काम गर्न बाँकी छन्। समितिका अनुसार अब काम पूरा गर्न अझै करिब दुई करोड रुपैयाँ आवश्यक छ।

भाठा मेला व्यवस्थापन समितिका अध्यक्ष गेनालाल पटेलका अनुसार अहिलेसम्म कुनै पनि सरकारी निकाय वा जनप्रतिनिधिबाट सहयोग पाइएको छैन।”संघीय र प्रदेश सरकारमा पर्साबाट पाँच मन्त्री रहे पनि यो धार्मिक स्थलको विकासमा कसैको चासो छैन,” पटेल गुनासो गर्छन्, “पानी परेका बेला ओत लाग्ने र राति बस्न मिल्ने व्यवस्था भए भक्तजनलाई राहत मिल्थ्यो।”

धर्मशाला पर्सा राष्ट्रिय निकुञ्जको चुरे डाँडाभित्र पर्छ। मन्दिर परिसर वन क्षेत्रमै पर्ने भएकाले संरचना निर्माणका लागि सरकारी अनुमति प्रक्रिया निकै झन्झटिलो भएको अध्यक्ष थारू बताउँछन्।साउन महिनाभर लाग्ने मेलामा भाठा धाममा भक्तजनको घुइँचो लाग्ने गर्छ। तीमध्ये करिब ७५ प्रतिशत भारतीय श्रद्धालु हुन्छन्। तर जङ्गली जनावरको जोखिमका कारण बेलुका ७ बजेदेखि बिहान ६ बजेसम्म मन्दिर पुग्ने सडक बन्द गरिन्छ।