श्रेणी : मधेस

वीरगन्ज,२६ असार । वीरगन्ज महानगरपालिका वडा नम्बर १४ अन्तर्गत बहुअरीस्थित श्री सारदा माध्यमिक विद्यालयमा अध्ययनरत कक्षा १० का ६० जना छात्राहरूलाई नेसनल एकेडेमी क्याम्पस, वीरगन्जले आज नयाँ कपडा वितरण गरेको छ । सामाजिक उत्तरदायित्व अन्तर्गत आयोजित उक्त कार्यक्रम नेसनल एकेडेमी क्याम्पसका प्रमुख केदार प्रसाद साहको नेतृत्वमा सम्पन्न भएको हो। कार्यक्रमका प्रमुख अतिथि वरिष्ठ समाजसेवी एवं अधिवक्ता प्रकाश कुमार उपाध्याय रहेका थिए ।

उक्त अवसरमा क्याम्पसका निर्देशक राजकुमार सहनी, प्राध्यापक अफरोज अहमद, अन्य शिक्षकगण तथा क्याम्पसका विद्यार्थीहरूको उल्लेखनीय उपस्थिति रहेको थियो। विद्यालयका प्रधानाध्यापक अनिल कुमार बर्णवालको विशेष उपस्थितिमा सम्पन्न कार्यक्रममा बोल्दै प्रमुख अतिथि उपाध्यायले भने, ‘शिक्षा नै समृद्धिको मेरुदण्ड हो। छात्राहरूलाई सशक्त बनाउने यस्ता प्रयासहरूले उनीहरूको भविष्य उज्वल बनाउनेछ।’ साथै उनले आगामी दिनहरूमा समेत शिक्षा तथा सामाजिक क्षेत्रमा निरन्तर सहयोग गर्दै जाने प्रतिबद्धता व्यक्त गरे ।

क्याम्पसका तर्फबाट जानकारी दिँदै आयोजकले शिक्षाको पहुँच वृद्धि र विद्यार्थीहरूको सशक्तिकरणका लागि यस प्रकारका सहयोग कार्यक्रमलाई निरन्तरता दिने बताए।