श्रेणी : मधेस

बीरगन्ज,३१ जेठ । बीरगन्जमा डेंगु नियन्त्रणमा समस्या भइरहेको स्वास्थ्यकर्मीहरुले बताएका छन् । बीरगन्ज महानगरपालिकामा डेंगु नियन्त्रणका लागि स्वास्थ्य कार्यालय पर्सा,बीरगन्ज महानगरपालिकाको स्वास्थ्य तथा सामाजिक विकास महाशखा लगायतका सरोकारवालाहरुले विगत ३ वर्षदेखि निरन्तर अभियान चलाउँदै आइरहेका छन् । तर वीरगन्जका नागरिक र पसलेहरुले डेंगु सार्ने लामखुट्टेका बासस्थान नष्ट गर्न अटेरी गर्दै आइरहेका कारण डेंगु नियन्त्रणमा समस्या भइरहेको स्वास्थ्यकर्मीहरुको गुनासो छ ।

स्वास्थ्य कार्यालय पर्साका अनुसार,बीरगन्ज महानगरमा ३ वर्ष यताको अवधिमा एक हजार १८ जनामा डेंगुको संक्रमण पुष्टि भएको छ । आर्थिक वर्ष २०७९/८० मा १९९ जनामा, आर्थिक वर्ष २०८०/८१ म ३४९ जनामा र चालु आर्थिक वर्ष २०८१/८२ मा ४७० जनामा डेंगुको संक्रमण पुष्टि भएको हो ।

बीरगन्जमा हरेक वर्ष डेंगुको संक्रमण बढ्दो क्रममा रहेको भएपनि यसको नियन्त्रणमा सरोकारवाला सरकारी निकायले सञ्चालन गरिरहेको अभियानमा नगरबासीको साथ र सहयोग भने नरहेको स्वास्थ्य कार्यालय पर्साका जनस्वास्थ्य अधिकृत जयमोद ठाकुरले बताए ।

शनिबार बीरगन्जमा आयोजित डेंगु सार्ने लामखुट्टेको बासस्थान खोजी गरी लार्भा नष्ट गर्ने सम्बन्धि अभिमुखीकरण कार्यक्रममा ठाकुरले भने,‘महानगरमा डेंगु नियन्त्रणका लागि स्वास्थ्य कार्यालय र महानगरको स्वास्थ्य महाशखाले विगत ३ वर्षदेखि निनरन्तर जनचेतनामुलकसहितका कार्यक्रम र अभियानहरु चलाउँदै आइरहेको छ । तर नगरबासीको साथ नपाएका कारण महानगरमा डेंगुबाट संक्रमित हुनेहरुको संख्या वर्षेनी बढ्दो क्रममा रहेको उनले बताए ।

ठाकुरले भने,‘ डेंगु सार्ने लामखुट्टेका बासस्थानहरु (ग्यारेजका पुराना टायर,पानी जमेका गमला,ड्रम,अव्यवस्थित कबाडी पसल इत्यादि) खोजी गरेर नष्ट गर्ने अनि बायो डार्ट औषधि छर्कने, टोल टोलमा जनचेतनामुलक पर्चा–पम्प्लेट बाँड्ने लगायतका अभियान महानगरमा ३ वर्षदेखि निरन्तर चलाइरहेका छौं ।’तर नगरवासीले यो अभियानमा संवेदनशील भएर सहयोग नगरिदिएका कारण समस्या भइरहेको उनले बताए ।

त्यसकारण अब बीरगन्ज महानगरपालिका डेंगु नियन्त्रण अभियानमा सहयोग नगर्नेहरुका लागि निर्मम भएर अगाडि बढनुपर्ने आवश्यकता भएको उनले बताए । कायर्यक्रममा सहभागी वीरगन्ज महानगरपालिकाका प्रमुख प्रशासकीय अधिकृत अरबिन्दलाल कर्णसामु ठाकुरले भने,‘हामीले जति गर्दापनि नगरबासीले त्यसलाई गम्भीरतापूर्वक लिएनन् ।डेंगु सार्ने लामखुट्टेका बासस्थानहरु न्ष्ट गर्दैछनन् । त्यसका कारण अब महानगरपालिकाले निर्मम भएर कदम चाल्नुपर्ने आवश्यक भइसकेको छ ।’

कार्यक्रममा बीरगन्ज महानगरपालिकाका प्रमुख प्रशासकीय अधिकृत अरबिन्दलाल कर्णले पनि यसप्रति महानगरपालिकाको ध्यानाकर्षण भएको बताए । उनले डेंगुको नियन्त्रण अभियानलाई महानगरमा अझ प्रभावकारीताका साथ अगाडि बढाइने र त्यसका लागि स्वास्थ्य कार्यालयलाई आवश्यक सहयोग र साथ दिन महानगर तयार रहेको प्रतिबद्धता जनाए ।

कार्यक्रममा यसवर्षपनि बीरगन्ज महानगरपालिकाका शहरी क्षेत्रमा पर्ने वडा नम्बर १ देखि १६ सम्म डेंगु सार्ने लामखट्टेको बासस्थान खोजी गरेर लार्भा नष्ट गर्ने अभियान छिट्टै सुरु गर्न लागिएको बीरगन्ज महानगरपालिकाको स्वास्थ्य महाशखाका जनस्वास्थ्य निरीक्षक सुमनचन्द्र ठाकुरले जानकारी गराए ।उनका अनुसार, यो अभियान अन्तर्गत हरेक वडामा तीन दिनसम्म चल्ने छ । अभियान अन्तर्गत जनचेतनामुलक पर्चा–पम्प्लेटहरुपनि वितरण गरिनेछ ।

बीरगन्ज महानगरपालिकाका प्रमुख प्रशासकीय अधिकृत अरबिन्दलाल कर्णको अध्यक्षतामा शनिबार भएको अभिमुखीकरण कार्यक्रममा स्वास्थ्य कार्यालय पर्साकी जनस्वास्थ्य अधिकृत मल्लिका श्रेष्ठ, खुश्बु यादव, बीरगन्ज महानगरपालिकाको स्वास्थ्य महाशाखा प्रमुख राजु साह, महानगरको वडा नम्बर १ देखि १६ सम्मका स्वास्थ्यकर्मी लगायतकाको सहभागिता थियो ।