श्रेणी : मधेस

बीरगन्ज,२५ जेठ । ट्राफिक सप्ताह २०८२ को चौथो दिन आइतबार पर्साको बीरगन्जमा सडक सुरक्षा जनचेतनासम्बन्धी विविध कार्यक्रमहरू सम्पन्न भएका छन्। पर्सा जिल्ला प्रहरी कार्यालय र जिल्ला ट्राफिक प्रहरी कार्यालयको संयुक्त आयोजनामा सम्पन्न कार्यक्रमहरूमा नागरिकलाई ट्राफिक नियमबारे जानकारी दिन विशेष पहल गरिएको हो।

कार्यक्रमअन्तर्गत नयाँ बसपार्क क्षेत्रमा निशुल्क आँखा जाँच सिविर सञ्चालन गरिएको थियो, जहाँ वीरगञ्ज सामुदायिक आँखा अस्पतालको प्राविधिक सहयोगमा चालक, सहचालक तथा यातायात क्षेत्रमा संलग्न १०७ जनाले आँखा परीक्षण गराएका छन्।

साथै, ट्राफिक सचेतना पर्चा वितरण, सवारी साधनहरूमा स्टिकर टाँस्ने, र पैदल यात्रुहरूलाई सडक पार गर्दा जेब्रा क्रसिङ प्रयोग गर्न प्रेरित गर्नेजस्ता व्यवहारिक अभ्याससमेत गराइएको थियो।

कार्यक्रमको नेतृत्व जिल्ला ट्राफिक प्रहरी कार्यालयका प्रमुख प्रहरी निरीक्षक लोकराज भट्टले गरेका थिए। उनले नागरिक सहभागिताविना सुरक्षित र अनुशासित सडक प्रणाली सम्भव नहुने उल्लेख गर्दै ट्राफिक सप्ताहलाई जनचेतनाको महत्वपूर्ण अवसरका रूपमा प्रयोग गरिएको बताए।

उक्त कार्यक्रममा प्रमुख अतिथिका रूपमा प्रहरी निरीक्षक निरोज चौलागाईं, ट्राफिक प्रहरीका गुणनिधि खकुरेल, समाजसेवी दिलीप कार्की, वडा नं. ४ का अध्यक्ष जगत साह कानु, पत्रकार अभिलाष गुप्ता, दीपक चौरसिया लगायतको उपस्थिति रहेको थियो।

कार्यक्रममा बीरगन्जका दुई शैक्षिक संस्थाका विद्यार्थीसाउथजोन मावि र एन्जल वर्ल्ड स्कूलको उल्लेखनीय सहभागिता देखिएको थियो। विद्यार्थीहरूलाई व्यस्त चोकहरूमा खटाई ट्राफिक पर्चा वितरण तथा पैदल यात्रुहरूलाई सही दिशाबाट हिँड्न र ट्राफिक शिष्टाचार पालना गर्न प्रेरित गरिएको थियो।

आयोजकहरूले यस्ता व्यवहारमैत्री र जनमुखी कार्यक्रमहरूले ट्राफिक नियमप्रति नागरिकमा चेतना अभिवृद्धि गराउँदै सडक दुर्घटना न्यूनीकरणमा महत्त्वपूर्ण भूमिका खेल्ने विश्वास व्यक्त गरेका छन्।