श्रेणी : कृषि

परासी,२४ जेठ । धान रोपाइँको तयारीमा जुटेका नवलपरासीका किसान यतिबेला रासायनिक मलको चरम अभाव झेल्दै छन्। सिँचाइ अभावबीच पम्पसेट प्रयोग गरेर धानको बिउ राखेका किसानले अब केही दिनमै रोपाइँ सुरु गर्ने तयारी गरेका छन्। तर, पर्याप्त मल नपाउँदा उनीहरूमा थप तनाव बढेको छ।

जिल्लामा सातवटा स्थानीय तह र ८० सहकारी संस्थामार्फत मल वितरण हुने व्यवस्था छ। तर कृषि ज्ञान केन्द्र परासीका प्रमुख डा. रवीन्द्रनाथ चौबेका अनुसार हालसम्म आएको मल खेतीयोग्य जमिनको एक तिहाइलाई मात्र पुग्ने खालको छ।

नवलपरासीमा कुल ४१ हजार हेक्टर खेतीयोग्य जमिनमध्ये २१ हजार हेक्टरमा धान खेती हुँदै आएको छ। यहाँ वार्षिक १८,३९८ टन युरिया, १०,६५७ टन डीएपी र ८,१४५ टन पोटास आवश्यक पर्छ। तर, चालु आर्थिक वर्षको साउनदेखि हालसम्म जम्मा ३,८९० टन युरिया र १,६८४ टन डीएपी मात्र आएको छ। बाँकी १५ हजार टन युरिया र ९ हजार टन डीएपी अझै अपुग रहेको चौबेले बताए।

स्थानीय तहहरूमा अपुग मलको स्थिति यस्तो छ:
रामग्राम नगरपालिकालाई आवश्यक ४,२५६ टन युरियामध्ये ७६० टन, र १,६५२ टन डीएपीमध्ये ३२९ टन मात्र पुगेको छ।
बर्दघाट नगरपालिकालाई आवश्यक ३,४६२ टन युरिया र १,८६० टन डीएपीमध्ये क्रमशः ४९३ टन र २१३ टन मात्र आपूर्ति भएको छ।सुनवल नगरपालिकामा १,८८५ टन युरिया र ९४३ टन डीएपी आवश्यक रहेकामा ५३५ टन युरिया र २३१ टन डीएपी आएको छ। पाल्हीनन्दन गाउँपालिकामा आवश्यकताभन्दा करिब एक चौथाइ मात्रै मल पुगेको छ।
प्रतापपुर, सरावल र सुस्ता गाउँपालिकामा पनि अवस्था उस्तै छ, सबै स्थानीय तहमा ६०–७० प्रतिशत मल अभाव छ।

कृषि सामग्री कम्पनी लिमिटेड परासी शाखाका प्रमुख ताराप्रसाद खनालका अनुसार सहकारीहरूले अनुदानमा पाएका मललाई थप ढुवानी खर्चसहित किसानलाई बिक्री गर्ने गर्छन्। युरिया बोरा ९५० रुपैयाँ, डीएपी २,२४४ र पोटास १,६४४ रुपैयाँमा बिक्री भइरहेको छ।

धान रोपाइँको मुख्य सिजन सुरु हुँदै गर्दा मल अभावले उत्पादन घट्ने र किसानको लगानी जोखिममा पर्ने चिन्ता बढेको छ। प्रदेश कार्यालयमार्फत केही मल पठाइने भनिए पनि अहिलेसम्म त्यसको अत्तोपत्तो छैन।