श्रेणी : मधेस

बीरगन्ज,१२ जेठ । बीरगन्ज महानगरपालिका वडा नं. ५ मा सडक किनार र गल्लीहरूमा अव्यवस्थित रूपमा झुण्डिएका इन्टरनेट, केबुल, र टेलिफोनका छाडा तारहरू हटाउने अभियान तीव्र रूपमा अघि बढाइएको छ। वडाध्यक्ष प्रदीप चौरसियाको नेतृत्वमा सुरु गरिएको यो अभियानप्रति स्थानीय बासिन्दाले सकारात्मक प्रतिक्रिया दिएका छन्।

वडाध्यक्ष चौरसियाका अनुसार, लामो समयदेखि सडकछेउमा झुन्डिएका तारहरूले न केवल आगलागीको जोखिम बढाएको थियो, तर आवागमनमा पनि बाधा पुर्‍याउँदै आएका थिए। “केही स्थानमा बालबालिका र वृद्धहरू लडेर घाइते भएका घटनासमेत देखिएका थिए,” उनले बताए।

कार्यको सुरुआत वडा नं. ५ का विभिन्न गल्ली र टोलहरूबाट गरिएको हो। अभियानमा वडासचिव अरुण बस्नेतको पनि सक्रिय भूमिका रहेको छ। प्राविधिक टिमको सहकार्यमा तार व्यवस्थापनलाई दिगो र सुरक्षित बनाउन आवश्यक तयारीहरू भइरहेको वडाले जनाएको छ।

स्थानीयहरू भने वडाको यो प्रयासप्रति उत्साहित छन्। एक बासिन्दाले भने, “सडक छेउ हिँड्नै नसक्ने अवस्था थियो, अब भने टोल नै नयाँजस्तो देखिन थालिसकेको छ।”

वडाध्यक्ष चौरसियाले अभियानलाई निरन्तरता दिने प्रतिबद्धता व्यक्त गरेका छन्। “हामी वडालाई सफा, सुरक्षित र आधुनिक बनाउने दिशामा नागरिकको साथ लिएर अघि बढिरहेका छौं,” उनले भने।