श्रेणी : अपराध

पोखरा,०१ जेठ । पोखरातर्फ जाँदै गरेको एक विद्युतीय माइक्रोबस बुधबार दुर्घटनामा पर्दा ३ जनाको मृत्यु भएको छ भने ८ जना घाइते भएका छन्। धादिङबाट आउँदै गरेको ग १ ज ८६३० नम्बरको माइक्रोबस पोखरा महानगरपालिका–३२ स्थित सडकमा दुर्घटनामा परेको हो।

कास्की जिल्ला प्रहरी कार्यालयका अनुसार दुर्घटनामा दुई महिला र एक पुरुषको घटनास्थलमै ज्यान गएको हो। मृतकमध्ये एकजनाको सनाखत भएको छ – पोखरा २५ हेम्जाकी ५५ वर्षीया झाङमाया गुरुङ। बाँकी दुई मृतक पुरुषको परिचय खुलिनसकेको प्रहरीले जनाएको छ।

घटनाका बेला मौसम प्रतिकूल रहेको, हावाहुरी र वर्षासमेत परिरहेको बताइएको छ। यस्तै, घाइते आठ जनाको पोखरास्थित गण्डकी अस्पतालमा उपचार भइरहेको छ।

प्रहरी नायब उपरीक्षक (डीएसपी) हरिबहादुर बस्नेतका अनुसार दुर्घटनाको कारणबारे थप अनुसन्धान भइरहेको छ। प्रारम्भिक अनुमान अनुसार सवारी अनियन्त्रित भएर सडकबाट तल खसेको हुन सक्ने बताइएको छ।