श्रेणी : मधेस

बीरगन्ज,१५ पुस । बीरगन्ज महानगरपालिकाले स्वास्थ्य संस्थामा कार्यरत स्वास्थ्यकर्मीहरूको सेवा सुविधामा सुधार गर्न निर्देशन दिएको छ। महानगरपालिकाअन्तर्गत सञ्चालन भइरहेका स्वास्थ्य संस्थाहरूमा कार्यरत स्वास्थ्यकर्मीहरूले पारिश्रमिक र सुविधा सम्बन्धी गुनासो गरेपछि यस्तो निर्णय गरिएको हो।

महानगरपालिकाले जारी निर्देशनअनुसार स्वास्थ्यकर्मीहरूको न्यूनतम पारिश्रमिक नेपाल सरकारले तोकेको दरभन्दा कम नहुने गरी लागू गरिनेछ। नियुक्ति प्रक्रियामा सम्झौता गरिनुपर्ने, ज्यालादारीमा काम गराउन नपाइने, अनुभव प्रमाणपत्र उपलब्ध गराइने, र पारिश्रमिक बैंकिङ प्रणालीमार्फत भुक्तानी गरिनुपर्ने व्यवस्था गरिएको छ।

स्वास्थ्य संस्थामा कार्यरत कर्मचारीहरूको पारिश्रमिक र सुविधाबारे सरकारले स्पष्ट निर्देशन दिएपछि बीरगन्ज महानगरपालिकाले पनि सोही अनुरूप सूचना जारी गरेको हो। यसले स्वास्थ्यकर्मीहरूको पेशागत सम्मान कायम राख्न र काम गर्ने वातावरण सुधार गर्न सहयोग पुग्ने विश्वास गरिएको छ।

महानगरपालिकाले यो कदमले स्वास्थ्यकर्मीहरूको मनोबल बढाउने र जनस्वास्थ्य सेवा प्रभावकारी बनाउने अपेक्षा राखेको छ।