श्रेणी : मधेस
1.8kViews
1559
Shares
सिरहा,१० पुस । सिरहामा नदीमा अवैध रुपमा उत्खनन् गरिरहेको अवस्थामा डोजर (जेसीबी) र टिपर नियन्त्रणमा लिइएको छ । गोलबजार नगरपालिका-१ स्थित गागन खोलाबाट मंगलबार बीहान डोजर र टिपर १/१ वटा नियन्त्रणमा लिइएको हो ।
नियन्त्रणमा लिइएको प्रदेश ३–०१–००३ क ६९२७ नम्बरको उक्त डोजर र प्रदेश २–०३–००१ क १९४८ नम्बरको चोहर्वास्थित सवडिभिजन वन कार्यालयमा राखिएको छ । सव डिभिजन वन कार्यालय, चोहर्वाका प्रमुख आविद हुसेनले यस विषयमा थप जिल्लाबाटै बुझ्नुपर्ने प्रतिक्रिया दिए ।
तर, डिभिजन वन कार्यालय, लहानका प्रमुख शैलेन्द्रकुमार मिश्रले यस विषयमा अनभिज्ञता जनाए । आफूलाई यस विषयमा जानकारी नभएको भन्दै उनी पन्छिए ।
डिभिजन वन कार्यालय, लहानका एक कर्मचारीका अनुसार मंगलबार बिहान ३ बजेतिर विशेष सूचनाका आधारमा लहानको टोली खोलामा गएको थियो । तर, उक्त टोलीले मात्रै ती गाडी नियन्त्रणमा लिन असम्भव भएपछि चोहर्वाबाट पनि थप टोली खोलामा गएको थियो ।
‘गाडीलाई नियन्त्रणमा लिन खोज्दा त्यहाँ उत्खनन् गराइरहेका मान्छेहरू गस्तीमा खटिएका कर्मचारीसँग नै जुध्न खोजेका थिए,’ एक कर्मचारीले कान्तिपुरसित भने, ‘त्यसपछि चोहर्वाबाट थप टोली गएपछि गाडी नियन्त्रणमा लिइएको थियो ।’
प्रतिक्रिया