श्रेणी : राजनीति

काठमाडौं । तनहुँ एकको उपनिर्वाचनमा नेपाली कांग्रेसका पराजित उम्मेदवार गोविन्द भट्टराईले निर्वाचित भएकोमा डा. स्वर्णिम वाग्लेलाई बधाई दिएका छन् ।

मंगलबार सामाजिक संजालमार्फत भट्टराईले वाग्लेलाई बधाई दिँदै आफ्ना मतदाताको अपेक्षा पूरा गर्ने विश्वास वाग्लेको अभिभारा भएको बताएका हुन् । उनले भनेका छन्, ‘सर्वप्रथम तनहुँ १ बाट प्रतिनिधि सभा सदस्यका रुपमा निर्वाचित हुनु भएकोमा हार्दिक बधाई ! चुनावी यात्राका दौरानमा हामीबीच सौहार्द प्रतिष्पर्धा रह्यो । र, संयोगले तपाईं निर्वाचित हुनुभयो । मैले मेरा क्षेत्रका मतदाताको अपेक्षा पूरा गर्ने विश्वास दिलाउन सकिनँ, तपाईंले सक्नुभयो । तपाईं यस क्षेत्रको आधिकारिक प्रतिनिधि निर्वाचित भइरहँदा मप्रतिका विकास अपेक्षा राखेका मतदाताको विश्वास पनि अब तपाईंको अभिभारा बन्न पुगेको छ ।’

उनले वाग्लेलाई मतदाताको विकासे चहना पूरा गर्ने अभियानमा रचनात्मक सहयोग हुने बताएका छन् । उनले भनेका छन्, ‘मैले पदको सपना नदेखे पनि यस क्षेत्रको विकासे अभियन्ताका रुपमा निरन्तर खटेको हुँ। अब पनि खटिरहनेछु । अनि तपाईंले चाहेमा यहाँका मतदाताको विकासे चाहना पूरा गर्ने अभियानमा मेरो रचनात्मक सहयोग अनि खबरदारीपूर्ण साथ रहिरहनेछ । यहाँका मतदाताको अति ठूलो अपेक्षा अनि भरोशा पूरा गर्न र राजनीतिक यात्रामा अब्बल बन्न सक्नुहोस्, मेरो धेरै धेरै शुभकामना छ ।’