वीरगञ्ज २९ पुस । पर्सा जिल्लामा शान्ति–सुरक्षा र सामाजिक सद्भाव कायम राख्ने उद्देश्यले जिल्ला प्रशासन कार्यालय पर्साको नेतृत्वमा सुरक्षा निकायको संयुक्त टोलीले आज वीरगञ्जको छपकैया क्षेत्रमा रहेका अतिम खाना र एक मस्जिदको अनुगमन गरेको छ।

अनुगमन टोलीमा पर्साका प्रमुख जिल्ला अधिकारी भोला दाहाल, जिल्ला प्रहरी कार्यालय पर्साका प्रहरी उपरीक्षक सुदीप राज पाठक, सशस्त्र प्रहरी बल नेपाल नं. १३ गणका गणपति सशस्त्र प्रहरी उपरीक्षक पूरणचन्द्र भट्ट तथा राष्ट्रिय अनुसन्धान कार्यालय पर्साका प्रतिनिधिहरूको सहभागिता रहेको थियो।

जिल्ला प्रशासनका अनुसार केही दिनअघि वीरगञ्जमा देखिएको धार्मिक तनाव र त्यससँग सम्बन्धित विरोध प्रदर्शनलाई ध्यानमा राख्दै शान्ति, सुरक्षा र सामाजिक सद्भाव कायम गर्ने उद्देश्यले अनुगमन गरिएको हो। यसअघि जिल्ला प्रशासन कार्यालय पर्सामा बसेको सर्वदलीय तथा सर्वपक्षीय बैठकको निर्णयअनुसार संवेदनशील क्षेत्रका धार्मिक स्थल तथा सार्वजनिक स्थानको अवस्था बुझ्न अनुगमन अघि बढाइएको जनाइएको छ।

अनुगमनका क्रममा अतिम खाना र मस्जिदमा सुरक्षा अवस्था, धार्मिक गतिविधिको सञ्चालन, व्यवस्थापन पक्ष तथा सम्भावित संवेदनशील विषयहरूबारे जानकारी लिइएको थियो। सुरक्षा निकायले कुनै पनि किसिमको अवाञ्छित गतिविधि हुन नदिन आवश्यक सतर्कता अपनाइएको र स्थानीय समुदाय तथा सरोकारवाला पक्षसँग समन्वय गरेर शान्ति कायम राखिने प्रतिबद्धता जनाएको छ।

जिल्ला प्रशासन कार्यालय पर्साले पर्सा जिल्लामा धार्मिक सद्भाव, आपसी सहिष्णुता र शान्तिपूर्ण वातावरण कायम राख्न सबै समुदायलाई संयमता अपनाउन र कानूनको पालना गर्न आग्रह गरेको छ।