श्रेणी : अपराध

रौतहट,२२ वैशाख । रौतहटको चन्द्रपुर नगरपालिका-१०, चेतनगर बजारमा एक औषधी पसलमा प्रतिबन्धित लागूऔषध बेच्ने व्यक्ति पक्राउ परेका छन्।

इलाका प्रहरी कार्यालय चन्द्रनिगाहपुरका अनुसार, २९ वर्षीय जितेन्द्र साहलाई आइतबार लागूऔषध ट्रामाडोलसहित पक्राउ गरिएको हो। साहले चेतनगरमा औषधी पसल सञ्चालन गर्दै आएका थिए।

स्थानीय स्रोतका अनुसार, साह लामो समयदेखि चिकित्सा व्यवसायको नाममा लागूऔषधको कारोबार गर्दै आएका थिए। गुप्त सूचनाका आधारमा सादा पोसाकमा खटिएको प्रहरी टोलीले साहको पसलमा छापा मारेर ४,५०० वटा ट्रामाडोल ट्याबलेट बरामद गरेको छ।

प्रहरी नायब उपरीक्षक राजकुमार राईका अनुसार, साहलाई बरामद लागूऔषधसहित नियन्त्रणमा लिइएको छ। अनुसन्धानको क्रममा साहले बागमती, चन्द्रनिगाहपुर र वरपरका क्षेत्रका युवाहरूलाई नियमित रूपमा लागूऔषध उपलब्ध गराउँदै आएको खुलासा भएको छ। उक्त घटनामा लागूऔषध नियन्त्रण ऐनअनुसार थप कारबाही प्रक्रिया अगाडि बढाइएको प्रहरी प्रमुख राईले जानकारी दिए।