श्रेणी : अर्थ

बीरगन्ज,२० जेठ । चालु आर्थिक वर्षको १० महिनामा नेपालको प्रमुख व्यापारिक नाका वीरगञ्ज हुँदै ५ खर्ब ६ अर्ब रुपैयाँभन्दा बढीको वस्तु आयात भएको छ। त्यस्तै, यही अवधिमा ७९ अर्ब रुपैयाँभन्दा बढीको निर्यातसमेत भएको छ — जसले आयात–निर्यात दुबै क्षेत्रमा उल्लेखनीय गतिविधि देखिएको संकेत गर्छ।

बीरगन्ज भन्सार कार्यालयका अनुसार आयात हुने वस्तुमध्ये सबैभन्दा बढी हिस्सा पेट्रोलियम पदार्थको रहेको छ। पाँच प्रकारका पेट्रोलियम पदार्थको मात्र मूल्य १ खर्ब ५५ अर्ब ९४ करोड रुपैयाँ पुगेको छ। त्यसपछि भटमासको कच्चा तेल दोस्रो स्थानमा रहँदै ४५ अर्ब ७९ करोडको आयात भएको छ।

त्यस्तै, २९ अर्ब बराबरका मेसिनरी सामान र २८ अर्ब ५१ करोड बराबरका फलाम तथा फलामका सामग्री भित्रिएका छन्। २३ अर्ब ८५ लाख रुपैयाँ बराबरका एलोपेथिक औषधिहरू पनि वीरगञ्ज नाकाबाट भित्रिएको तथ्याङ्कले देखाउँछ।

यो आर्थिक वर्षको १० महिनामा वीरगञ्ज नाकाबाट भएको निर्यातले पनि चकित तुल्याउने नतिजा देखाएको छ। ७९ अर्ब ३ करोड रुपैयाँको वस्तु निर्यात भएकोमा, अघिल्लो वर्षको यही अवधिको तुलनामा २१० प्रतिशतले वृद्धि भएको हो। गत वर्ष त्यही अवधिमा निर्यात रकम २५ अर्ब ४८ करोड रुपैयाँ मात्र थियो।

निर्यात हुने वस्तुमध्ये सबैभन्दा बढी प्रशोधित भटमासको तेल रहेको छ। चालु वर्षमा मात्र ४६ अर्ब ५३ करोड रुपैयाँ मूल्य बराबरका २१ करोड ९२ लाख लिटर भटमास तेल बाहिरिएको छ। यो अघिल्लो वर्षको भन्दा दोब्बरभन्दा बढी हो।

त्यस्तै, सूर्यमुखीको प्रशोधित तेल निर्यात पनि निकै वृद्धि भएको छ। गत आवमा जम्मा १० करोड रुपैयाँको निर्यात भए पनि यस वर्ष ७ अर्ब २७ करोड रुपैयाँ मूल्य बराबरका ३ करोड ५२ लाख लिटर सूर्यमुखी तेल विदेश पठाइएको छ।