श्रेणी : BANNER

काठमाडौं । प्रतिनिधिसभाका सदस्यहरुले नेपालीलाई नक्कली भुटानी शरणार्थी बनाएर अमेरिका पठाउने नाममा भएको ठगी प्रकरणका दोषी जोगाउने काम हुन नहुने भन्दै सरकारलाई खबरदारी गरेका छन् ।

मंगलबारको प्रतिनिधिसभा बैठकको शून्य समयमा उनीहरुले भुटानी शरणार्थी प्रकरणमा जोडिएका सबैमाथि छानबिन हुनुपर्ने र दोषीमाथि कारबाही गर्नुपर्ने बताएका हुन् ।

बैठकमा नेकपा एमालेका सांसद ठाकुर गैरेले नेपाली नागरिकलाई भुटानी शरणार्थी बनाउने काम राष्ट्रघात र देशद्रोही भएको बताएका छन् । उनले भने, ‘नेपाली नागरिकलाई भुटानी शरणार्थी बनाउने, करोडौँ असुल्ने जघन्य अपराध हो । राष्ट्रघात हो । देशद्रोही काम हो ।’

उनले अहिलेसम्म जाँचबुझको काम कहाँ पुगेको छ सदनलाई जानकारी गराउन माग गरे । उनको प्रश्न थियो, ‘कोही व्यक्ति पक्राउ परेका छन् । कोही भागिरहेका छन् । कोही नोटिसमा हुनुहुन्छ तर सदनमा बोलिरहनुभएको छ । जाँचबुझ के भइरहेको छ ? सरकारले के गरिरहेको छ ?’

सांसद देवेन्द्र पौडेलले नेपालीलाई भुटानी शरणार्थी बनाएर अमेरिका पठाउने घटनाले नेपाल पक्ष भएर गरिएका सम्झौता र सन्धिविपरीत भएकाले दोषीलाई कारबाही गर्नुपर्ने बताए ।