श्रेणी : अपराध

बीरगन्ज,२९ माघ । गएको आइतबार दिउँसो पर्साको ठोरी गाउँपालिकामा एकजना वृद्ध नगदसहित लुटिएका छन्। तर, घटनामा प्रहरीले अहिलेसम्म कुनै ठोस उपलब्धि हासिल गर्न सकेको छैन । पर्सा जिल्लाको जीराभवानी गाउँपालिका–१ पकडी टोलका ७० वर्षीय वृद्ध बंगाली बण्ठसँग २२ हजार रुपैयाँ लुटिएको थियो ।

बंगाली बण्ठाका छोराले मलेसियाबाट पठाएको रकम ठोरी गाउँपालिका वडा नम्बर–५ सुवर्णपुरमा रहेको राष्ट्रिय वाणिज्य बैंकबाट झिकेर उनी धानको बिउ र मल किन्न फर्कने क्रममा अपरिचित व्यक्तिले आइतबार दिउँसो २ बजे नगद लुटेर फरार भएका थिए। लुटपाटको क्रममा ती व्यक्तिले आफूलाई प्रहरी असई भएको दाबी गर्दै धम्क्याएर वृद्धसँग पैसा लिएर मोटरसाइकलमा भागेको पीडितको भनाइ छ ।

घटनापछि पीडितले तत्कालै प्रहरी चौकी सुवर्णपुरमा निवेदन दिएका थिए । तर, हालसम्म प्रहरीको सक्रियता नदेखिएको पीडितको गुनासो छ ।

प्रहरी सहायक निरीक्षक शिवराज ठाकुरले भने घटनापछि सीसीटीभी फुटेजको आधारमा पीडितले बताएको हुलियाका आधारमा दुई शंकास्पद व्यक्तिलाई नियन्त्रणमा लिएर अनुसन्धान गरेको बताए। तर, उनीहरूले लुटेको प्रमाण नपाएपछि जिम्मा जमानीमा छोडिएको उनले जानकारी दिए ।

इलाका प्रहरी कार्यालय ठोरीका प्रहरी निरीक्षक रञ्जित लामाले भने प्रहरी चौकी सुवर्णपुरबाट आफूलाई रिपोर्टिङ नै नगरिएको र घटनाबारे गम्भीर भएर तत्काल अनुसन्धान थाल्ने बताए ।

प्रहरी सहायक निरीक्षक ठाकुरको ढिलासुस्ती र लापरबाहीका कारण प्रहरीको भूमिकामाथि प्रश्न उठेको छ। वृद्धले लुटपाटको क्रममा लुटेराले “असई हो, के लिएर हिँडेको?” भनेर धम्क्याएको बताए पनि सहायक निरीक्षक ठाकुरले भने वृद्ध आफैंले पैसा उपचारका लागि दिएको भन्ने कुरा गरेको बताउँदा घटना झन् रहस्यमय देखिएको छ ।