श्रेणी : मधेस

वीरगन्ज,२२ पुस । वीरगन्ज महानगरपालिका – १० मा चिसो र शीतलहरको समयमा सडकमा बस्ने कुकुरहरूको सुरक्षाका लागि विशेष पहल गर्दै कुकुर बस्ने घरहरूको व्यवस्था गरिएको छ ।

वडाध्यक्ष सुशील कुमार कानुको नेतृत्व र पहलमा स्थानीय महिला समाजसेवी कञ्चन बाहेती र उनको समूहले अग्रसरता लिँदै कुकुरहरूको लागि घर निर्माणको कार्यलाई मूर्तरूप दिएका हुन् ।

वडाध्यक्ष कानुले सडकमा बस्ने कुकुरहरूको हेरचाह गर्नु मानवताको उत्कृष्ट उदाहरण भएको बताउँदै भने, “सडकमा बस्ने कुकुरहरूले हाम्रो माया र सहयोगको आवश्यकता छ । हाम्रो सानो प्रयासले उनीहरूको जीवनमा ठूलो सकारात्मक प्रभाव पार्नेछ ।”

कुकुर बस्ने घरहरू निर्माण भएपछि स्थानीय बासिन्दाहरूले खुसी व्यक्त गरेका छन् । “अभियानले समुदायमा दया र समर्पणको भावना झल्काउँछ । यस्ता कार्यले मानवता र पशुप्रतिको संवेदनशीलतालाई प्रवर्द्धन गर्छ,” स्थानीय समाजसेवी प्रदीप बरनवालले भने ।

वडा नम्बर १० का विभिन्न स्थानमा निर्माण गरिएका कुकुर बस्ने घरहरूले सडकका कुकुरहरूलाई चिसोबाट बचाउनुका साथै अन्य वडाहरूलाई पनि यस्तै प्रयास गर्न प्रेरणा दिने विश्वास वडाध्यक्ष कानुले व्यक्त गरेका छन् ।

वडाध्यक्ष कानुले यस प्रकारका कुकुर बस्ने घर निर्माण गर्न अन्य वडा कार्यालयहरूले पनि पहल गर्न सक्ने सुझाव दिएका छन् । उनले भने, “यस कार्यका लागि आवश्यक परामर्श र सहजीकरण गर्न वडा नम्बर १० सधैँ तयार छ । समाजका सबै वडाहरूमा यस्ता प्रयास भए अझ राम्रो सन्देश प्रवाह हुनेछ ।”

अभियानले वीरगन्जकाे स्थानीय समाजमा सकारात्मक चर्चा ल्याएको छ, र दाताहरूको निरन्तर सहयोगले आगामी दिनमा अझ प्रभावकारी कार्यक्रम ल्याउन मद्दत गर्ने अपेक्षा गरिएको छ ।