श्रेणी : अपराध

बीरगन्ज,२१ साउन । मानव बेचबिखन र लागुऔषध ओसार–प्रसारजस्ता सामाजिक अपराधबारे विद्यार्थीलाई सचेत गराउने उद्देश्यसहित बीरगन्ज–१६ स्थित सनलाईट कलेजमा एक विशेष जनचेतनामूलक कार्यक्रम सम्पन्न भएको छ। कार्यक्रम सामुदायिक प्रहरी साझेदारी कार्यक्रम अन्तर्गत कुम्हालटोल सामुदायिक प्रहरी सेवा केन्द्रको आयोजनामा गरिएको हो।

कार्यक्रममा वडा प्रहरी कार्यालय बिर्ताका प्रमुख प्रहरी निरीक्षक निरोज चौलागाईं प्रमुख अतिथि रहेका थिए। उनले मानव बेचबिखनका स्वरूपहरू, कानुनी प्रावधान, लागुऔषधको दुष्परिणाम, ओसार–प्रसारका माध्यम र विद्यार्थी तहमा देखिन सक्ने जोखिमहरूबारे गहन जानकारी प्रस्तुत गरे। उनले विद्यार्थीलाई सजग रहन, सामाजिक जिम्मेवारी निभाउन र कुनै पनि आपराधिक गतिविधि देखेमा प्रहरीलाई तुरुन्त जानकारी गराउन आग्रह गरे।

कार्यक्रमको अध्यक्षता कुम्हालटोल सामुदायिक प्रहरी सेवा केन्द्रका वरिष्ठ सल्लाहकार श्याम केसीले गरेका थिए भने सञ्चालन सचिव श्रवणबहादुर रायमाझीले गरे।

कार्यक्रममा सनलाईट कलेजका प्रिन्सिपल आलोक चौरसिया, समाजसेवी मार्टिन मोक्तान, नन्दलाल राउत, प्रहरी हवल्दार कुमार विक, तारा बिष्ट, अतिथि सन्तोषमान रजितकार, टोल सुधार समाज अध्यक्ष नन्दलाल अहिर, सामुदायिक केन्द्र उपाध्यक्ष सञ्जु दाहाल, लाल बाबू सिंह, सुशील वर्णवाल, सम्झना मल्ल लगायत विभिन्न क्षेत्रका व्यक्तित्वहरूको उपस्थिति रहेको थियो।

विद्यार्थीहरूले कार्यक्रममा गहिरो चासोका साथ सहभागिता जनाएका थिए। उनीहरूको प्रश्नोत्तर, जिज्ञासा र विचारहरूले उनीहरूमा चेतनास्तरमा वृद्धि भएको देखिएको थियो। कार्यक्रमले उनीहरूमा आत्मविश्वास, सार्वजनिक बोल्ने क्षमता र सुरक्षा सजगता अभिवृद्धिमा सहयोग पुर्‍याएको आयोजकले जनाएको छ।