श्रेणी : मधेस

काठमाडौं,२९ माघ । जनता समाजवादी पार्टी (जसपा) नेपालले भूमिसम्बन्धी अध्यादेशलाई समर्थन नगर्ने निर्णय गरेको छ। मंगलबार सिंहदरबारमा बसेको संसदीय दलको बैठकमा यो निर्णय गरिएको हो।

सरकारले संसद् अधिवेशन नरहेका बेला विभिन्न ६ वटा अध्यादेश ल्याएको थियो, जसमा भूमिसम्बन्धी अध्यादेश पनि समावेश छ। जसपा नेपालले उक्त अध्यादेशलाई समर्थन नगर्ने निर्णय गरेको हो, जबकि बाँकी ५ वटा अध्यादेशलाई अगाडि बढाउने सन्दर्भमा सकारात्मक रहने निर्णय गरेको छ।

यस निर्णय अघि जसपा नेपालले उपाध्यक्ष राजकिशोर यादवको नेतृत्वमा कार्यदल गठन गरेर अध्यादेशको अध्ययन गरेको थियो। अध्ययन प्रतिवेदनको आधारमा पार्टीले यस्तो निर्णय गरेको हो।

जसपा नेपालका सांसद प्रकाश अधिकारीका अनुसार, भूमिसम्बन्धी अध्यादेशमा वन क्षेत्र र सार्वजनिक जग्गाको नोक्सान हुने प्रावधान रहेको छ, जसको कारण भू- माफियाको प्रभाव बढ्न सक्ने चिन्ता व्यक्त गरिएको थियो। जनताको हितमा रही यस निर्णयमा पुगेको सांसद अधिकारीले बताए।