श्रेणी : BANNER

वीरगञ्ज, ४ फागुन । आगामी प्रतिनिधिसभा सदस्य निर्वाचनलाई केन्द्रमा राख्दै नेपाल कम्युनिस्ट पार्टी (एमाले) ले वीरगञ्ज महानगरपालिका वडा नं. १६ नगवामा चुनावी प्रचार–प्रसार तथा सम्पर्क विस्तारका लागि नयाँ कार्यालय सञ्चालनमा ल्याएको छ।
नवस्थापित कार्यालयको उद्घाटन पर्सा निर्वाचन क्षेत्र नं. १ बाट प्रतिनिधिसभा सदस्य पदका उम्मेदवार प्रदीप यादव ले रिबन काटेर गरेका हुन्। पार्टी संगठन सुदृढीकरण, जनसम्पर्क विस्तार र स्थानीय तहसम्म एमालेको पहुँच बलियो बनाउने उद्देश्यले कार्यालय सञ्चालनमा ल्याइएको जनाइएको छ।
वडा तहबाटै अभियान विस्तार गर्ने एमालेको रणनीति
उद्घाटन समारोहलाई सम्बोधन गर्दै पूर्वमन्त्रीसमेत रहेका यादवले उक्त कार्यालयलाई वडा तहबाटै सुरु गरिएको सशक्त जनसम्पर्क अभियानको आधारका रूपमा वर्णन गरे। उनले वीरगञ्जलाई समृद्ध, सफा र व्यवस्थित सहर बनाउने एमालेको स्पष्ट दृष्टिकोण रहेको बताए।
उनका अनुसार शिक्षा र स्वास्थ्य सेवाको गुणस्तर सुधार, युवाका लागि रोजगारी तथा उद्यमशीलताको अवसर सिर्जना, साथै सडक, बिजुली र खानेपानीजस्ता आधारभूत पूर्वाधार विकासलाई प्राथमिकतामा राखेर काम गरिनेछ। वीरगञ्जलाई औद्योगिक केन्द्रसँगै पर्यटकीय गन्तव्यका रूपमा विकास गर्ने लक्ष्य पनि एमालेको मुख्य चुनावी एजेन्डामा रहेको उनले स्पष्ट पारे।
विगतको अनुभव, आगामी विकासको प्रतिबद्धता
यादवले आफ्नो सांसद तथा मन्त्रीकालमा जनताको सेवामा गरेका कामहरूको स्मरण गर्दै अनुभवकै आधारमा वीरगञ्जको समग्र विकासलाई नयाँ उचाइमा पुर्‍याउने प्रतिबद्धता व्यक्त गरे। “जनताको दैनिक जीवन सहज बनाउने र विकासलाई तीव्रता दिने मेरो प्रमुख लक्ष्य हो,” उनले भने।
साथै, उनले वडा नं. १६ का मतदाता, शुभेच्छुक तथा समर्थकहरूलाई कार्यालयमा नियमित रूपमा उपस्थित भई सुझाव र सल्लाह दिन तथा अभियानमा सक्रिय सहभागिता जनाउन आग्रह गरे।
संगठन विस्तार अभियानलाई तीव्रता
कार्यालय उद्घाटनसँगै एमालेले वीरगञ्ज–१६ मात्र नभई सहरका अन्य वडाहरूमा पनि जनसम्पर्क र संगठन विस्तार अभियानलाई तीव्र बनाउने जनाएको छ। उक्त कार्यालयलाई उम्मेदवार, कार्यकर्ता र सर्वसाधारणबीचको नियमित सम्पर्क केन्द्रका रूपमा प्रयोग गरिनेछ।
उद्घाटन कार्यक्रममा पूर्व सांसद प्रभु हजरा, निर्मला देवकोटा, क्षेत्रीय संयोजक मानदेव हजरा, सुन्दर कुर्मी, रामबाबु पासवान, अरुण यादव, भुसाल चौरसिया लगायत नेताहरूको उपस्थिति रहेको थियो।
घरदैलो कार्यक्रम स्थगित
यसैबीच, आज बिहान वीरगञ्ज–१८ सौराहामा तय गरिएको प्रदीप यादवको घरदैलो कार्यक्रम स्थानीय बासिन्दा बलिस्टर यादवको निधनका कारण स्थगित गरिएको क्षेत्रीय कमिटीले जानकारी दिएको छ। पार्टीका नेताहरू स्वर्गीय यादवको अन्त्येष्टि कार्यक्रममा सहभागी हुने पनि एमालेले जनाएको छ।