श्रेणी : समाचार

धरान । कोकाहा खोला श्रमदान अभियानमार्फत झण्डै ४० किलोमिटर दुरी पार गर्दै सोमबार मध्यरातमा धरानस्थित पकुवा खोलामा पानी आइपुगेपछि धरानमा खुसीयाली छाएको छ ।

धरानका मेयर हर्क साम्पाङको नेतृत्वमा चलेको श्रमदान अभियानमार्फत् मध्यराति १२ बजेर ३ मिनेटमा कोकाहा खोलाको पानी धरान २० स्थित पकुवा खोलामा झरेको हो । मेयर साम्पाङको प्रस्तावित साबुन उद्योग निर्माणस्थलको केही उत्तरमा पर्ने पकुवा खोलामा राखिएको ‘वास आउट पोइन्ट’ मा पानी आइपुगेपछि समर्थकहरुसँगै मेयर साम्पाङ भावविह्वल बनेका थिए ।

धरानमा पानीको चरम अभाव भएपछि कोकाहाको पानी नल्याई घर नफर्कने अभिव्यक्ति दिएका साम्पाङ आइतबार राति अगुवा श्रमदातासँगै थिए । रातभर ‘एयर लिक’ गर्न खटिएका उनी पकुवा खोलामा मध्यराति १२ बजेर ३ मिनेटमा पानी खसेपछि साढे १२ बजे घर फर्किएका थिए ।

अभियानका लागि देशविदेशबाट ४ करोडभन्दा बढी स्वतःस्फुर्त आर्थिक संकलन गरिएको थियो भने खाद्यान्न र पाइपसमेत सहयोग गरिएको थियो ।

पानी आएपछि मेयर साम्पाङले भनेका छन्, ‘म एउटा सानो मान्छेको कोकाहा ल्याउने सपना पूरा गर्न ९९ दिनसम्म हजुरहरुले गर्नुभएको साथ र सहयोगप्रति आभारी छु । प्रत्यक्ष र अप्रत्यक्ष रुपमा सहयोग गर्नुहुने लाखौ जनतालाई धन्यवाद बाहेक केही दिन सक्दिन । यहाँहरुको माया र साथको लागी सधै आभारी रहनेछु ।’

 https://www.facebook.com/plugins/video.php?height=327&href=https%3A%2F%2Fwww.facebook.com%2F100057352183960%2Fvideos%2F178830951541146%2F&show_text=false&width=560&t=0