श्रेणी : अपराध

हेटौंडा,२६ जेठ । मकवानपुर प्रहरीले ठूलो मात्रामा गाँजासहित दुई महिलालाई पक्राउ गरेको छ। पक्राउ पर्नेमा कैलाश गाउँपालिका–२ की ४० वर्षीया फुलमाया स्याङ्वो र ३० वर्षीया निर्मला मोक्तान रहेका छन्।

हेटौंडाबाट बीरगन्जतर्फ जाँदै गरेको बा ३ ख ८३९४ नम्बरको यात्रुवाहक बसलाई हेटौंडा उपमहानगरपालिका–१५ स्थित रातोमाटे चेकपोष्टमा रोकेर चेकजाँच गर्ने क्रममा उनीहरूलाई पक्राउ गरिएको जिल्ला प्रहरी कार्यालय मकवानपुरले जानकारी दिएको छ।

चेकजाँचका क्रममा उनीहरूले बोकेको झोलाबाट १० किलो ४ सय ग्राम गाँजा बरामद भएको प्रहरीको भनाइ छ। दुवै महिलामाथि लागूऔषध सम्बन्धी मुद्दा दर्ता गरी थप अनुसन्धान अगाडि बढाइएको प्रहरीले जनाएको छ।

प्रहरीका अनुसार गाँजा ओसारपसारको सञ्जालमा महिलाको संलग्नता बढ्दो छ भन्ने तथ्य पछिल्ला घटनाहरूले देखाइरहेका छन्। यसप्रति सतर्कता अपनाउँदै चेकिङ कडा पारिएको प्रहरीले जनाएको छ।