श्रेणी : मधेस
2.9kViews
1698
Shares
जनकपुर,२४ जेठ । मधेश प्रदेश सरकारले आगामी आर्थिक वर्ष २०८२/८३ को नीति तथा कार्यक्रममा एक महत्वपूर्ण सार्वजनिक सहभागिता योजना घोषणा गरेको छ। प्रदेश सरकार अब ‘हेल्लो सिएम (Hello CM)’ कार्यक्रममार्फत जनताको गुनासो, सुझाव र समस्याहरू सिधै मुख्यमन्त्रीको कार्यालयसम्म पुर्याउने व्यवस्था गर्न लागेको हो।
मुख्यमन्त्री सतिशकुमार सिंह नेतृत्वको सरकारले जनताको आवाज सिधै सरकारसम्म ल्याउने उद्देश्यले यो कार्यक्रम ल्याएको जनाइएको छ। नीति तथा कार्यक्रममा उल्लेख गरिएअनुसार, यो पहलले प्रदेशमा सुशासन प्रवर्द्धन र सरकार–नागरिक सम्बन्ध मजबुत बनाउन सघाउनेछ।
‘हेल्लो सिएम’ कार्यक्रम अन्तर्गत नागरिकहरूले फोन, सामाजिक सञ्जाल वा डिजिटल प्लेटफर्ममार्फत आफ्ना कुरा सरकारसम्म पुर्याउन सक्नेछन्। गुनासोहरू दर्ता, ट्र्याकिङ र समाधानका लागि सूचना प्रविधिमा आधारित विशेष ड्यासबोर्ड/पोर्टल निर्माण गरिने बताइएको छ।
“हेल्लो सिएम हाम्रो गम्भीर प्रयत्न हो—जनताको नजिक पुग्न, जनअपेक्षालाई बुझ्न र प्रत्यक्ष संवाद गर्न। यसले सरकारलाई अझ जवाफदेही बनाउनेछ।”
प्रदेश सरकारले यो कार्यक्रमलाई समावेशी, पारदर्शी र प्रभावकारी रूपमा कार्यान्वयन गर्ने प्रतिबद्धता जनाएको छ। स्थानीय नागरिकका समस्या सुन्ने र समाधान गर्ने यस्तो प्रणाली पहिलो पटक औपचारिक रूपमा मधेश प्रदेशमा सुरु हुँदैछ।
जनस्तरसम्म सन्देश पुर्याउने र जनतासँग सिधा सम्बन्ध बनाउने यस ‘हेल्लो सिएम’ कार्यक्रमलाई प्रदेशवासीले आशाका साथ हेरिरहेका छन्।
प्रतिक्रिया