वीरगंज (पर्सा), १५ चैत । पर्साको सखुवा प्रसौनी गाउँपालिका वडा नं. ५ महुवन स्थित श्री रामजानकी इङ्गलिस बोर्डिङ स्कुलको लापरवाहीले एकजना बालक अस्पतलामा जीवन मृत्यसँग जुद्धि रहेका छन् । अध्ययन गर्न स्कुलमा आएका सखुवा प्रसौनी गाउँपालिका वडा नं. ५ महुवन निवासी सोही स्कुलको कक्षा एलकेजीमा अध्ययनरत ७ बर्षिय विद्यार्थी अनुप गोढलाई स्कुलले घर निर्माणको काममा लगाउँदा फलाममा लडेर टाउकोमा गम्भिर चोट लागेको छ ।

घाइते बालक बाराको परवानीपुर गाउँपालिका वडा नं. ५ स्थित एलएस न्युरो एण्ड जेनरल होस्पिटलको आई.सि.यू. वार्डमा जीवन मृत्युँसगँ जुद्धि रहेका छन् । विगत एक हप्तादेखि बालकको अस्पतालमा उपचार भइरहेको छ । गम्भिर घाइते अनुपको टाउकोमा २८ वटा टांका लागेको हस्पिटलले जनाएको छ । स्कुलमा पढन गएका आफ्नो छोरालाई सखुवा प्रसौनी गाउँपालिका वडा नं. ५ महुनवन निवासी नै विद्यालयकी संचालिका भगवन्ती कलवारले घर निर्माणको काममा लगाएपछि फलाममा लडेर घाइते भएको चन्दन साह गोढले वताए ।

विद्यार्थीको उमेरको ख्याल नगरी विद्यालय नजिक निर्माण भइरहेको घरमा ज्यालादारीको काममा लगाउँदा आफ्नो छोरा घाइते भएको उनको भनाई छ । उनले कलवारको लापरवाहीले विद्यालयमा पढन गएका आफ्नो छोरा घाइते भएकोले कारवाहीको माग गर्दै बुधबार इलाका प्रहरी कार्यालय पोखरियामा उजरी समेत दिएका छन् । विद्यालयकी संचालिका कलवारले निर्माण भइरहेको विद्यालय भवनको भित्ता खसेर बालक घाइते भएको वताइन् । उनले कुनै पनि बालबालिकालाई आफुले भवन निर्माणको काममा नलगाएको वताइन् ।

भवन निर्माण भइरहेको ठाउँमा होली मनाउन तयारी गरिरहेका ठुला/ठुला विद्यार्थीहरुसंगै गएका अनुप समेत भित्तामा लडेर घाइते भएको उनको भनाई छ । घाइते भएको दिनदेखि नै आफुले अनुपको उपचार समेत गराउँदै आएको विद्यालयकी संचालिक कलवारले जानकारी गराइन् । पीडितले बुधबार मात्र जाहेरी दिएकोले घटनाबारे अनुसन्धान भइरहेको इलाका प्रहरी कार्यालय पोखरियाका प्रहरी निरीक्षक मोहन बिक्रम केसीले वताए । वीरगंज टाईम्स