श्रेणी : धर्म संस्कृति

बीरगन्ज,२१ असार । मुस्लिम समुदायको महत्वपूर्ण पर्व मोहर्रमको अवसरमा बीरगन्जमा हुने ‘बाना भाज्ने’ कार्यक्रमको स्थान परिवर्तन गरिएको छ। आगामी असार २२ गते (आइतबार) हुने यो धार्मिक कार्यक्रम पहिले पुरानो बसपार्कमा तय गरिएको भए पनि अब आदर्शनगर रंगशालामा स्थानान्तरण गरिएको छ।

स्थानीय जिल्ला सुरक्षा समितिको असार २० गते बसेको बैठकले सुरक्षाका दृष्टिकोणले पुरानो स्थान उपयुक्त नरहेको ठहर गर्दै यो निर्णय लिएको हो। सहायक प्रमुख जिल्ला अधिकारी बाबुलाल रेग्मीका अनुसार, पुरानो बसपार्क क्षेत्रमा अत्यधिक भिडभाड हुने र सुरक्षा जोखिम बढ्ने भएकाले विकल्पको रूपमा रंगशालालाई चयन गरिएको हो।

“स्थल परिवर्तनको मुख्य कारण सहभागीको ठूलो संख्यालाई ध्यानमा राखी सुरक्षा व्यवस्थालाई थप सुदृढ बनाउने हो,” रेग्मीले जानकारी दिए। यस सम्बन्धमा बीरगन्ज महानगरपालिकालाई पत्र पठाइ स्वीकृति मागिएको छ। परिवर्तन गरिएको नयाँ स्थलले धार्मिक उत्सवलाई थप सुरक्षित, शान्तिपूर्ण र व्यवस्थित बनाउने विश्वास गरिएको छ।