श्रेणी : अपराध

बीरगन्ज, २९ माघ । १६ वर्षदेखि फरार रहेका सवारी ज्यान मुद्दाका दुई अभियुक्त पर्साबाट पक्राउ परेका छन्। पक्राउ पर्नेमा बीरगन्ज महानगरपालिका–१७ का ६५ वर्षीय छठु साह तेली र वडा नम्बर २५ का ४० वर्षीय चन्दु राउत कुर्मी रहेका छन्।

तेलीविरुद्ध २०६४ वैशाख १४ गते कलावतीदेवी सोनारीनले उजुरी दिएकी थिइन्। उनले चलाएको ना.१ ह ९०७ नम्बरको टेम्पोले ठक्कर दिँदा राजेन्द्र साह सोनारको मृत्यु भएको थियो। माघ २७ गते पक्राउ परेका उनलाई ७ दिनको म्याद थप गरी अनुसन्धान जारी रहेको जिल्ला प्रहरी कार्यालय पर्साले जनाएको छ।

त्यस्तै, आदेशप्रसाद कुर्मीको जाहेरीका आधारमा चन्दु राउत कुर्मी पक्राउ परेका हुन्। उनले चलाएको ना.३ प ९७१८ नम्बरको मोटरसाइकल दुर्घटना हुँदा २०६४ माघ ३ गते होरिल राउत कुर्मीको मृत्यु भएको थियो। माघ २८ गते पक्राउ परेका उनलाई ५ दिनको म्याद थप गरी अनुसन्धान भइरहेको सूचना अधिकारी डीएसपी किशोर लम्सालले जानकारी दिए।