श्रेणी : राजनीति

काठमाडौं । नवनियुक्त परराष्ट्रमन्त्री एनपी साउदले आइतबार सिंहदरबारस्थित मन्त्रालय पुगेर पदभार ग्रहण गरेका छन् । राष्ट्रपति रामचन्द्र पौडेलबाट पद तथा गोपनीयताको शपथ लिएलगत्तै परराष्ट्रमन्त्री साउदले पदभार ग्रहण गरेका हुन् । पदभार ग्रहणपछि मन्त्री साउदले छिमेकी तथा सबै देशहरूसँग घनिष्ठ सम्बन्ध बनाउने बताए ।

उनले प्रधानमन्त्री पुष्पकमल दाहाल प्रचण्डको भारत भ्रमणबारे भने सचिवहरूबाट ब्रिफिङ लिएपछि प्रक्रिया थाल्ने बताए । उनले नेपालले सबै छिमेकीहरूसँग सौहार्दपूर्ण र शान्तिपूर्ण सम्बन्धलाई कायम राख्ने बताए ।

उनले भने,‘नेपालको सबै छिमेकी राष्ट्रहरूसँग विगतदेखि नै हाम्रो सौहार्दपूर्ण र शान्तिपूर्ण सम्बन्ध छ र आगामी दिनमा पनि सबै छिमेकी देशहरूसँगको सम्बन्धलाई घनिष्ट बनाउँदै लैजानेछौँ ।’