काठमाडौं,०५ फागुन । नेपाल विद्युत् प्राधिकरणले सर्वसाधारणलाई सेयर (आईपीओ) निष्कासन गर्ने तयारी थालेको छ। प्राधिकरणले लगातार तेस्रो वर्ष ‘डबल ए प्लस’ (AA+) क्रेडिट रेटिङ प्राप्त गरेको छ, जसले यसको वित्तीय स्थायित्वलाई पुष्टि गरेको छ।

सरकारबाट स्वीकृति पाउनेबित्तिकै सेयर निष्कासन प्रक्रिया अघि बढाइने प्राधिकरणका कार्यकारी निर्देशक कुलमान घिसिङले बताए। सेयर बिक्रीबाट संकलित रकम ठूला जलविद्युत् आयोजनाको निर्माणमा लगानी गरिनेछ।

विद्युत् उत्पादन, प्रसारण र वितरणलाई सक्षम, भरपर्दो र सर्वसुलभ गरी विद्युत् आपूर्तिको समुचित व्यवस्था गर्न सरकारको पूर्ण स्वामित्वमा प्राधिकरण स्थापना गरिएको हो । प्राधिकरणले देशभित्र विद्युत् उत्पादन, प्रसारण र वितरणका अतिरिक्त आन्तरिक तथा सीमापार विद्युत् व्यापार गरिरहेको छ ।

प्राधिकरणको हालको चुक्ता पुँजी करिब ३ खर्ब रुपैयाँ रहेको छ, जसको २० प्रतिशतसम्म प्रिमियमसहित प्रतिकित्ता ३ सय रुपैयाँ कायम गरी सेयर निष्कासनको प्रस्ताव गरिएको छ। वित्तीय मजबुतीसहित देशभित्र र सीमापार विद्युत् व्यापार गरिरहेको प्राधिकरणले पछिल्लो समय १४ अर्ब ४६ करोड रुपैयाँ नाफा कमाएको छ।

२०७२/७३ मा ८ अर्ब ८९ करोड रुपैयाँ खुद नोक्सानीमा रहेकामा २०७३/७४ मा १ अर्ब ५० करोड खुद नाफा कमाउँदै प्राधिरणले नाफाको इतिहास सुरु गरेको थियो । २०८०/८१ मा १४ अर्ब ४६ करोड रुपैयाँ नाफा कमाएको थियो । २०७२/७३ मा ३४ अर्ब ६१ करोड रुपैयाँ सञ्चित घाटामा रहेको प्राधिकरण अहिले ४७ अर्ब ४१ करोड सञ्चित नाफामा पुगेको छ । गत आर्थिक वर्षमा प्राधिकरणले प्रणालीको विद्युत् चुहावट करिब १२ दशमलव ७३ प्रतिशतमा झारेको थियो ।