श्रेणी : BANNER

रौतहट,१२ भदौ । रौतहटको सनसनीपूर्ण रुबी साह हत्या प्रकरणमा मुख्य आरोपी लक्ष्मण पासवानको मृत्यु भएसँगै अनुसन्धान फाइल बन्द हुने सम्भावना बढेको छ।

बुधबार साँझ ६ बजे काठमाडौँको कीर्तिपुरस्थित वर्न अस्पतालमा उपचारका क्रममा लक्ष्मणको मृत्यु भएको जिल्ला प्रहरी कार्यालय रौतहटका प्रवक्ता डीएसपी राजु कार्कीले जानकारी दिए। लक्ष्मणलाई बिहान रौतहटको माधवनारायण नगरपालिका–६ मा गम्भीर रूपमा जलेको अवस्थामा फेला परेपछि अस्पताल ल्याइएको थियो। उनले आत्महत्या गर्ने उद्देश्यले पेट्रोल छर्केर आगो लगाएको प्रहरीले जनाएको छ।

प्रहरी प्रमुख एसपी नेत्रमणि गिरीका अनुसार, “घटना अझै अनुसन्धानको चरणमा छ, तर यदि अन्यको संलग्नता प्रमाणित भएन भने मुद्दा बिस्तारै बन्द हुनेछ।” घटनामा संलग्न ई–रिक्सा चालक राजकुमार महरा अहिले पनि प्रहरी हिरासतमा छन्। तर उनी प्रत्यक्ष संलग्न नदेखिएको प्रहरीको प्रारम्भिक भनाइ छ।

आत्मदाह अघि रेकर्ड गरिएको भिडियोमा लक्ष्मणले रुबीको हत्या आफूले गरेको स्वीकार गरेका थिए। भिडियोमा उनले रुबीसँग लामो समयदेखि प्रेम सम्बन्ध रहेको र दुई पटक विवाह गरेको तर आर्थिक कारणले सम्बन्ध तनावपूर्ण बनेको बताएका छन्।

रुबी केही महिनादेखि गौरमा डेरा लिएर चार वर्षीय छोरालाई पढाउँदै आएकी थिइन्। लक्ष्मण करिब सात महिना अघि विदेशबाट फर्किएका थिए र गौरमै डेरा लिएर बस्दै आएका थिए।

गत शनिबार राति गौर–सिरसिया सडकखण्डमा सुटकेसमा महिला शव फेला परेपछि सुरु भएको अनुसन्धानमा, ई–रिक्सा चालक महराको बयानका आधारमा प्रहरीले गौर–५ स्थित लक्ष्मणको डेरा पत्ता लगाएको थियो। त्यहीँ रुबीको हत्या भएको पुष्टि भएको हो।

प्रहरीका अनुसार, लक्ष्मणले रुबीको हत्या गरेपछि शवलाई सुटकेसमा हालेर फाल्न ई–रिक्सा भाडामा लिएका थिए। शव फाल्ने क्रममा रिक्साको पाङ्ग्रा बिग्रिएपछि केही दूरी उनले पैदलै बोक्दै गएको विवरण रिक्साचालकले दिएका छन्।

यो घटनाले स्थानीयवासी मात्र नभई सम्पूर्ण जिल्लामा ठूलो चर्चा र आक्रोश फैलाएको छ।