श्रेणी : BANNER

वीरगञ्ज (पर्सा), १५ फागुन । राजनीतिक धार परिवर्तन गर्दै महिला नेतृ गुडी जोशी नेपाल कम्युनिष्ट पार्टी (एमाले)मा प्रवेश गरेकी छन्। यसअघि उनी राष्ट्रिय स्वतन्त्र पार्टीसँग आबद्ध रहँदै सक्रिय राजनीतिमा संलग्न थिइन्।
वीरगञ्ज महानगरपालिका वडा नं. ८ निवासी जोशी पर्सा क्षेत्र नं. १ (ख) बाट स्वतन्त्र प्रदेशसभा सदस्य पदकी प्रत्याशीसमेत भइसकेकी छन्। राजनीतिक अनुभवसहित सक्रिय पहिचान बनाएकी जोशीलाई एक औपचारिक कार्यक्रमबीच एमालेमा स्वागत गरिएको हो।
कार्यक्रममा बोल्ने वक्ताहरूले जोशीको संगठनात्मक क्षमता, राजनीतिक परिपक्वता र विकासप्रतिको स्पष्ट दृष्टिकोणले पार्टीको अभियानलाई थप गति दिने विश्वास व्यक्त गरे। विशेषगरी स्थानीय तहमा उनको सक्रियताले एमालेको जनसम्पर्क र संगठन विस्तारमा सकारात्मक प्रभाव पार्ने धारणा व्यक्त गरिएको थियो।
पार्टी प्रवेशपछि मन्तव्य राख्दै जोशीले मुलुकमा सुशासन, राजनीतिक स्थायित्व र जनताको जीवनस्तर उकास्न एमालेमार्फत सक्रिय भूमिका निर्वाह गर्ने बताइन्। उनले विकास, समावेशिता र जनमुखी नीतिलाई प्राथमिकतामा राख्दै स्थानीय तहदेखि प्रदेशस्तरसम्म जनताको पक्षमा निरन्तर काम गर्ने प्रतिबद्धता व्यक्त गरिन्।
कार्यक्रममा सहभागी एमाले नेताहरूले जोशीको प्रवेशले महिला तथा युवामाझ उत्साह थपिने विश्वास व्यक्त गरे। उनीहरूले सक्षम र ऊर्जाशील नेतृत्वको रूपमा जोशीले पार्टीभित्र महत्वपूर्ण भूमिका निर्वाह गर्ने अपेक्षा राख्दै उनको राजनीतिक यात्राको सफलताको कामना गरेका थिए।
राजनीतिक समीक्षकहरूका अनुसार जोशीको एमाले प्रवेशले पर्सा क्षेत्रको स्थानीय राजनीतिमा नयाँ सन्देश प्रवाह गरेको छ। आगामी दिनमा उनको सक्रियताले संगठन विस्तारसँगै जनस्तरमा एमालेको प्रभाव बढ्ने आकलन गरिएको छ।