श्रेणी : मधेस

जनकपुर,३१ चैत । “दलित पत्रकारको सशक्तीकरण र समानताको सुनिश्चितता” भन्ने मूल नारासहित राष्ट्रिय दलित पत्रकार संघ, नेपाल मधेस प्रदेशको प्रथम अधिवेशन सम्पन्न भएको छ ।

सङ्घका अध्यक्ष कैलाश दासको अध्यक्षतामा जनकपुरधाममा सम्पन्न अधिवेशनको उद्घाटन मधेस प्रदेशका सभामुख रामचन्द्र मण्डलले गरेका थिए ।

कार्यक्रममा सङ्घका केन्द्रीय अध्यक्ष विनोद पहाडी, प्रदेशसभा सदस्य राम आशिष् यादव र लखन दास, सङ्घका केन्द्रीय उपाध्यक्ष भोला पासवान, सञ्चारकर्मीहरू, अधिकारकर्मीहरू, विभिन्न जिल्लाबाट आएका प्रतिनिधि र समुदायका अगुवाहरूको उल्लेखनीय उपस्थिति रहेको थियो ।

सभामुख मण्डलले समाजमा गहिरो रूपमा गढिएको जातीय विभेद विरुद्ध लड्न दलित पत्रकारहरूको अग्रसरता अपरिहार्य रहेको बताउँदै संविधानले प्रत्याभूत गरेका समानता र न्यायलाई व्यवहारमा उतार्न सञ्चार क्षेत्र प्रभावकारी माध्यम बन्न सक्ने धारणा राखे । उनले भने, “समतामूलक समाज निर्माणमा सञ्चारकर्मीहरूको भूमिका निर्णायक हुन्छ ।”

कार्यक्रममा सङ्घका केन्द्रीय उपाध्यक्ष भोला पासवानले दलित पहिचानकै कारण आफूले पत्रकार महासङ्घको सदस्यता गुमाउनु परेको अनुभव सुनाउँदै सञ्चार क्षेत्रमा जातीय आधारमा विभेद भइरहेकोप्रति गम्भीर चिन्ता व्यक्त गरे। उनले निष्पक्ष मूल्याङ्कन र समान अवसरको अपेक्षा गर्दै यस्तो विभेद अन्त्य गर्न राज्य र सरोकारवालाले ध्यान दिनुपर्नेमा जोड दिए ।

अधिवेशनका विभिन्न सत्रहरूमा दलित पत्रकारहरूले भोगिरहेका समस्या, योगदान, र सुधारका उपायहरूबारे छलफल भएको थियो । सहभागी वक्ताहरूले सञ्चार क्षेत्रमा समावेशिता र समान अवसर सुनिश्चित गर्न नीतिगत तहमा ठोस पहल आवश्यक रहेको बताएका थिए ।

अधिवेशनको समापन सत्रमा सङ्घको नयाँ प्रदेश कार्यसमिति सर्वसम्मत रूपमा चयन गरिएको छ । जसअनुसार कैलाश दास पुनः अध्यक्षमा चयन भएका छन् । उपाध्यक्षमा आशिष् विश्वकर्मा र पूजा पासवान, सचिवमा सूर्यनारायण वि.क., सहसचिवमा मेघराज पासवान (निखिल) र राम प्रवेश बैठा तथा कोषाध्यक्षमा मन्नु पासवान चयन भएका छन् ।

त्यस्तै, सदस्यहरूमा ममता बैठ्या, रामनाथ राम, गोपाल महरा, शर्मा बैठ्या, सुशील हजरा, सुब्बा साहेब पासवान लगायत रहेका छन् ।

पुनः अध्यक्षमा चयन भएका दासले पहिलो कार्यकालमा स्रोत र साधनको अभावबिच पनि महत्त्वपूर्ण कार्यहरू सम्पन्न गरेको उल्लेख गर्दै दोस्रो कार्यकाललाई उपलब्धिमूलक बनाउने प्रतिबद्धता जनाए । उनले मधेस प्रदेशका दलित पत्रकारहरूको पेसागत हकहित, क्षमता अभिवृद्धि, संरचनागत विस्तार र सुरक्षाका लागि निरन्तर क्रियाशील रहने बताए ।

सङ्घले जिल्ला स्तरीय संरचना विस्तार, दलित युवाहरूको सञ्चार क्षेत्रमा सहभागिता वृद्धि, साझेदारी सञ्जाल निर्माण र तालिम कार्यक्रम सञ्चालनलाई प्राथमिकतामा राखिने सङ्घका नवनिर्वाचित सचिव सूर्यनारायण विकले बताए ।