श्रेणी : BANNER

वीरगञ्जसँग जोडिएको सीमावर्ती भारतीय सहर रक्सौलमा नक्कली तथा ठगी गर्ने मार्केटिङ कम्पनीहरू विरुद्ध प्रहरीको बृहत् छापा अभियान सम्पन्न भएको छ। एसएसबी ४७औं बटालियन, एंटी ह्यूमन ट्राफिकिङ टोली, प्रयास जुभेनाइल एड सेन्टर, रक्सौल थाना लगायत विभिन्न सुरक्षा निकायको संयुक्त अपरेशनमा ठगीमा संलग्न कम्पनीका कार्यालयहरूमा छापा मारिँदा ५६८ बालबालिकालाई उद्दार गरिएको छ, जसमा ७९ नाबालिग बालक र ४ बालिका रहेका छन्।

ठगी कम्पनीहरू विरुद्ध छापा, मुख्य संचालक फरार
एसएसबीका डिप्टी कमान्डेन्ट दीपक कृष्ण र एसडिपिओ धीरेन्द्र कुमारको नेतृत्वमा नागारोड, कोइरियाटोला, ब्लक रोड, सैनिक रोड, कौडीहार, मौजेलगायतका एक दर्जनभन्दा बढी स्थानहरूमा छापा मारिएको थियो। प्रहरीले ठगीमा संलग्न कम्पनीका विभिन्न कार्यालयहरू सिल गरेको छ भने महत्त्वपूर्ण दस्तावेजहरू बरामद गरेको छ।

तर, ठगी कम्पनीका मुख्य संचालकहरू भने फरार भएका छन्। प्रहरीले उनीहरूलाई पक्राउ गर्न खोजी कार्य तीव्र बनाएको छ। फरार कम्पनी संचालक एनामूल हक सहित ३ व्यक्तिविरुद्ध प्राथमिकी दर्ता गरी कानुनी प्रक्रिया अघि बढाइएको छ।

प्रारम्भिक अनुसन्धान अनुसार ठगी कम्पनीहरूले औषधिको बिक्री तथा नेटवर्किङमार्फत किशोर–किशोरी र युवाहरूलाई आकर्षित गरिरहेका थिए। नेपाल, उत्तर प्रदेश, उडिसा र बिहारका बालबालिकाहरूलाई तालीमको नाममा ठगी गरी औषधिको प्याकिङ तथा मार्केटिङ कार्यमा संलग्न गराइएको पाइएको छ।

बालबालिकाको मानसिक ब्रेनवाश
प्रयास जुभेनाइल एड सेन्टरकी जिल्ला परियोजना समन्वयक आरती कुमारीले उद्दार गरिएका बालबालिकाको काउन्सलिङ गरेकी छिन्। काउन्सलिङका क्रममा बालबालिकाले आफूहरूलाई अन्जान व्यक्तिसँग कुरा गर्न निषेध गरिएको र मानसिक रूपमा ब्रेनवाश गरिएको बताएका छन्।

उनीहरूलाई ठूला सपना देखाएर प्रोडक्ट सेल गर्न बाध्य पारिएको थियो। बालबालिकाको मोबाइलबाट उनीहरूका सम्पर्क व्यक्तिहरूलाई फोन गराएर नयाँ व्यक्तिहरू कम्पनीमा जोड्न लगाइन्थ्यो। जसले धेरै व्यक्तिलाई कम्पनीमा जोड्थ्यो, उसको तलब बढाइने बताइएको थियो।

अनुमंडल पदाधिकारी शिवाक्षी दिक्षितले उद्दार गरिएका बालबालिकासँग प्रत्यक्ष कुराकानी गर्दै घटनाबारे जानकारी लिएका छन्। साथै, उनले ठगी नेटवर्किङ कम्पनीलाई तत्काल सिल गर्न निर्देशन दिए, जसलाई रक्सौल प्रशासनले तुरुन्तै कार्यान्वयन गर्दै कोरिया टोला स्थित कम्पनी कार्यालय सिल गर्यो।

रक्सौल अंचलाधिकारी शेखर राजको नेतृत्वमा कम्पनी सिल गर्ने कार्य सम्पन्न गरियो। यस क्रममा कम्पनीका विभिन्न महत्वपूर्ण दस्तावेजहरू बरामद गरिएको छ।

एसएसबीका डिप्टी कमान्डेन्ट दीपक कृष्णले तालीमको नाममा ठगी गर्दै बालबालिकाहरूलाई अवैध कार्यमा संलग्न गराइएको पुष्टि गरेका छन्। एसडिपिओ धीरेन्द्र कुमारका अनुसार ठगीको गुनासो प्राप्त भएपछि एसएसबीसँग सहकार्य गरी संयुक्त अभियान सञ्चालन गरिएको हो।

चार सयभन्दा बढी बालबालिकाको उद्धार भए पनि ठगीमा संलग्न मुख्य सञ्चालकहरूको खोजी कार्य तीव्र पारिएको छ। प्रहरीले दोषीहरूलाई कडा कानुनी कारबाही गर्ने प्रतिबद्धता जनाएको छ।

घटनाले सीमावर्ती क्षेत्रका बालबालिकाको सुरक्षामा गम्भीर प्रश्न उठाएको छ। मानव तस्करी, ठगी र शोषणविरुद्ध कडा कानुनी कारबाहीको माग हुँदै आएको छ। स्थानीय र सुरक्षाकर्मीहरूको सहयोगमा ठगी गर्ने कम्पनीहरूको जालो ध्वस्त पार्न थप प्रभावकारी कदम चाल्नुपर्ने आवाज उठेको छ।