श्रेणी : BANNER

भैरहवा,०४ भदौ । रुपन्देहीको मर्चवार क्षेत्रका किसानहरू अहिले युरिया मलको कालोबजारीका कारण पीडित बनेका छन्। मुलुकमा आवश्यक परिमाण पर्याप्त उपलब्ध नहुँदा भारतीय मलमा निर्भर किसानहरूले ९ सय रुपैयाँमा पाइने मल २ हजार ५००–३ हजार ५०० रुपैयाँ तिर्न बाध्य भएका छन्।

स्थानीय सहकारीमार्फत पर्याप्त मल नपाएपछि किसानहरूले घरदैलोमा ओसारिएको भारतीय मल खरीद गर्नुपरेको छ। सीमावर्ती क्षेत्रमा रातारात भित्र्याइएको मल केही व्यक्तिले उच्च मूल्यमा स्थानीय बजारमा बिक्री गर्ने गरेको स्थानीय किसानले बताएका छन्।

सम्मरीमाई–७ का ७३ वर्षीय नजाबुद्धिन मुसलमानका अनुसार, यसपटक उनी भारतबाट ल्याएको मल ३ हजार ५०० रुपैयाँ प्रति बोरामा खरिद गर्न बाध्य भएका छन्। उनले भने, “पहिले पानी नपरेर समस्या भयो, अहिले मल नपाएर दुःख छ। मल पाए दिन खुसी हुन्छ।”

स्थानीय सहकारीमा वितरण अभावले किसानबीच झगडा पनि बढेको छ। श्री महालक्ष्मी स्वावलम्बन बचत तथा ऋण सहकारीका व्यवस्थापक महेश लोधले बताए अनुसार, आवश्यकताभन्दा कम मल उपलब्ध भएकोले किसानहरूले रकम फिर्ता माग्ने, धक्कामुक्की र तनाव बढ्ने स्थिति सिर्जना भएको छ।

स्थानीय अगुवा रामविकास चौधरीका अनुसार, पहिले भारतमा मल सस्तो र सजिलै उपलब्ध हुने भएकाले किसान त्यहाँबाट मल ल्याएर अभाव पूर्ति गर्थे। तर, पछिल्लो समय कालोबजारी र मूल्य वृद्धि भएपछि किसानहरू निकै प्रभावित भएका छन्।

किसानहरूले भने, “जनतालाई प्रजातन्त्र आएको छैन, तर मल खरीद गर्न भारतीय र स्वदेशी सुरक्षा दुबैबाट कठिनाइ भोग्नुपर्छ।”