श्रेणी : अन्तर्राष्ट्रिय

संयुक्त राष्ट्रसंघका एक पूर्व उच्च अधिकारीले म्यान्मारमा सेनाले आफ्नै नागरिकविरूद्ध प्रयोग गर्न कम्तीमा १३ देशका कम्पनीहरूले आपूर्ति गरेका सामग्रीहरूबाट थुप्रै प्रकारका हतियारहरू निर्माण गरिरहेको बताएका छन् ।

म्यान्मारलाई एक्लाउन पश्चिमा नेतृत्वको प्रतिबन्ध लागेको भए पनि त्यसरी हतियार बनाउन सामग्री आपूर्ति गर्नेमा अमेरिका, फ्रान्स, भारत र जापानलगायतका देशहरू रहेको भनेर नाम सहित उल्लेख गरिएको छ ।

प्रतिवेदनका अनुसार सेनाको विरोध गर्नेविरुद्ध घरेलु उत्पादित हतियारहरू नै प्रयोग गरिएको थियो । सन् २०२१ को फेब्रुअरीमा सैन्य कू भएयता म्यान्मार हिंसामा फसेको छ ।

निर्वाचित सरकारलाई सत्ताबाट बाहिर निकालेको सैनिक कूको विरोध गर्नेहरू त्यसपछि लागु गरिएको सैनिक शासनको प्रतिरोध गर्न जातीय विद्रोही समूहहरूमा आवद्ध भएका छन् ।

म्यान्मार मामिलामा विशेष परामर्श परिषदले तयार पारेको उक्त प्रतिवेदनमा संयुक्त राष्ट्रसंघका थुप्रै सदस्य राष्ट्रहरूले त्यहाँको सेनालाई हतियार बेच्न निरन्तरता दिएको उल्लेख छ ।

नाम उल्लेख गरिएका कम्पनीहरूले म्यानमारको सेनालाई कच्चा पदार्थ आपूर्ति गर्ने देखि तालिम र मेसिनहरू उपलब्ध गराउने गरेका छन्। त्यसरी उत्पादित हतियारहरू सीमा सुरक्षाका लागि प्रयोग नभएको पनि प्रतिवेदनले जनाएको छ ।

सबैभन्दा पछिल्लो सैन्य कू यता म्यान्मारमा सेनाबाट मारिनेहरूको आधिकारिक सङ्ख्या २६ सय भन्दा बढी रहेको छ। यद्यपि, त्यसरी ज्यान गुमाउनेहरूको वास्तविक सङ्ख्या त्योभन्दा १० गुणा बढी भएको ठानिएको छ।