श्रेणी : खेलकुद

काठमाडौं । नेपाल टी–ट्वान्टी लिग क्रिकेट प्रतियोगितामा म्याच फिक्सिङ गरेको आरोपमा दुई क्रिकेटर पक्राउ परेका छन् । प्रहरीले पूर्वक्रिकेटर महबुब आलम र राष्ट्रिय क्रिकेट खेलाडी मोहम्मद आदिल अन्सारीलाई पक्राउ गरेको हो । उनीहरुलाई सोमबार बिहान नेपाल प्रहरीको केन्द्रीय अनुसन्धान ब्युरो (सीआईबी) ले पक्राउ गरेको हो ।

आदिल राजविराजबाट पक्राउ परेका हुन् भने महबुबलाई प्रहरीले विराटनगरबाट पक्राउ गरेको जानकारी दिएको छ । क्रिकेट संघ(क्यान)ले मिलेमतो वा कुनै अवैध कार्य नभएको दाबी गरे पनि सीआईबीले सट्टेबाजी र मिलेमतोको आशंकामा अनुसन्धान थालेको थियो ।

भारतीय कम्पनी सेभेन थ्रि स्पोर्टससँगको साझेदारीमा नेपाल क्रिकेट संघ क्यानले पहिलो संस्करणको टी–२० लिग गत पुस ८ देखि आयोजना गरेको थियो । आयोजना साझेदार सेभेन थ्रीसमेत फिक्सिङमा संलग्न भएको प्रहरीले जनाएको छ । सुरुवातदेखि नै विवादित बनेको प्रतियोगिता १० खेल सकिएपछि फिक्सिङका कारण थप आलोचित बनेको थियो ।