श्रेणी : अन्तर्राष्ट्रिय

ऊर्जा नीतिदेखि चीनसम्मका विषयमा जारी तनावका बीच फ्रान्सका राष्ट्रपति इमानुयल म्याक्रोँले आगामी जुलाईमा जर्मनीको पहिलो राजकीय भ्रमण गर्ने भएका छन् ।  राष्ट्रपति फ्रान्क वाल्टर स्टेनमियरको निमन्त्रणामा राष्ट्रपति म्याक्रोँले जुलाई २ देखि ४ सम्म जर्मनीको भ्रमण गर्ने भएका हुन् । 

स्टाइनमियरको कार्यालयले २३ वर्षमा फ्रान्सका राष्ट्रपतिको यो पहिलो राजकीय भ्रमण हुने जनाएको छ । म्याक्रोँले स्टेनमियरसँग ‘जर्मनीका विभिन्न क्षेत्रहरू’ को भ्रमण गर्ने र हाम्रा राज्यहरू, हाम्रा नागरिकहरू र विशेष गरी जर्मन र फ्रान्सेली युवाहरू बीचको अद्वितीय सम्बन्धलाई जोड दिने बताएका छन् । 

“यो विशेष कार्यक्रमले दुई देशको दशकौँ पुरानो मित्रतामा नयाँ अध्यायको सुरुवात गरेको छ,” बर्लिनले भनेको छ । साथै स्टेनमेयर र म्याक्रोँबीचको घनिष्ठ व्यक्तिगत सम्बन्धको पनि सुरुवात भएको छ ।

जर्मनीकी विदेशमन्त्री एनालेना बेयरबोकले फ्रान्सेली समकक्षी क्याथरिन कोलोनासँग मङ्गलबार भेटवार्ता गर्ने र बुधबार एलिसी प्यालेसमा हुने मन्त्रिपरिषद्को बैठकमा सहभागी हुने कार्यक्रम रहेको म्याक्रोँको कार्यालयले जनाएको छ ।

जर्मनी, जोर्डन र इजिप्टका विदेशमन्त्रीसँग मध्यपूर्वको अवस्थाबारे छलफलका लागि कोलोना बिहीबार बर्लिनमा हुने अपेक्षा गरिएको छ ।

नयाँ विश्वव्यापी वित्तीय सम्झौताका लागि सम्मेलन, जुनको अन्त्यमा युरोपेली सङ्घको शिखर सम्मेलन र जुलाईमा नेटो शिखर सम्मेलनलगायतका महत्वपूर्ण कार्यक्रमहरू अघि म्याक्रोँले ६ जुनमा जर्मन चान्सलर ओलाफ स्कोल्जलाई भेट्न बर्लिनबाहिर पोट्सडाम जानेछन् । 

फ्रान्सेली राष्ट्रपतिले ‘दुई देशबीच अझ घनिष्ठ सहयोग’ को विकाश गर्न शरद ऋतुमा दुई सरकारहरूको बैठकको घोषणा पनि गरेका छन् ।